सोलापूर-सात रस्ता परिसरातील कारीगर बंगला हि जागा संगनमताने खरेदीखत व लिव्ह अँड लायसेन्सी करून भाडेतत्त्वावर देऊन व बनावट दस्त करून फिर्यादीची फसवणूक केल्याप्रकरणी तसेच फिर्यादीस जागेमध्ये येण्यास शिवीगाळ दमदाटी प्रकरणी माजी पोलीस उप अधिक्षक महिबुब अ.करीम मुजावर व डॉ. असलम महिबुब मुजावर दोघे रा.सोलापूर यांचा अटकपूर्व जामीन अर्ज मे.जिल्हा व सत्र न्यायाधीश श्रीमती. शिरभाते यांनी मंजूर केला.
यात हकिकत अशी की,सन 2010 साली सोलापूर शहरातील सात रस्ता परिसरामध्ये सिटी सर्व्हे नंबर म्यु. पल घर नं. 1./सी. व टी.पी.नं.3 तसेच सी. टी. सर्व्हे नं. 1641 असे एकूण क्षेत्र 2081.5 चौ. मी इतके क्षेत्र हे नजीर महमद हनिफ कारीगर यांचे नावावर होते त्यापैकी 1040.75 इतके क्षेत्र 1) खलील हजिभोलुमिया सालार 2) कु. बिलकीस महीबुब मुजावर 3)
अ. रशिद म.हनिफ शेख असे वरील तिघांना हिबाबिल एवज पध्दतीने मिळाली.वरील तिघांचे नावावर सदरची मिळकत होती. त्याबाबत डिड ऑफ सेटलमेंट अँड अंडरस्टँडींग करार झाला त्यापैकी अ. रशिद म. हनिफ शेख यांचे नावावर कराराप्रमाणे 20% प्रमाणे 208.15 चौ. मीटर जागा वाटयाला आली होती.
अ. रशिद म. हनिफ शेख याने त्याच्या वाटयाला आलेल्या एकुण 208.15 चौ. मीटर जागेमधून 149.17 चौ.मी. जागा फिर्यादी, सौ. रंजीता संकलेश चाकोते व सौ. डॉ. किरण सुदीप चाकोते असे रक्कम रू.5,50,000/- रुपयास विक्री केली होती. त्या नंतर 58.98 चौ.मी. जागा हि महिबुब अ. करिम मुजावर यांना दस्ताने विक्री केली असल्यामुळे अ. रशिद शेख यांच्या वाट्याला आलेली एकुण 208.15 चौ. मीटर जागा ही संपूर्ण संपलेली होती.
महिबुब अब्दुल करीम मुजावर यांना वरील झालेल्या व्यवहाराबाबत कोणाच्या वाटयाला किती जागा आलेली आहे याबाबत पुर्ण कल्पना होती कारण की, कु. बिलकीस महिबुब मुजावर ही महिबुब अब्दुल करीम मुजावर यांची नात्याने मुलगी आहे व महिबुब मुजावर यांनी देखील स्वतः जागा खरेदी केलेली होती हे सर्व माहित असतांना देखील महिबुब अब्दुल करीम मुजावर यांनी अ. रशिद म. हनिफ शेख यांचेशी संगणमत करुन 138.76 चौ.मी. चे क्षेत्र हे डॉ. असलम महिबुब मुजावर यांना दस्ताने विक्री केली आहे. त्यानंतर अब्दुल रशिद म. हनीफ शेख व महिबुब मुजावर यांनी संगणमत करून अब्दुल रशिद म. हनीफ शेख यांचे वाट्यास आलेली एकुण 208.15 चौ.मीटर संपुर्ण विक्री केली असल्यामुळे संपलेली आहे हे माहित असतांना देखील महिबुब मुजावर यांनी क्षेत्र 208.15 चौ.मी. इतके क्षेत्रा त्यामध्ये आर.सी.सी बांधकाम हे अब्दुल रशीद म. हनीफ शेख यांच्याकडून खरेदी करून स्वतःच्या नावावर करून घेतली.
त्यानंतर अब्दुल रशिद शेख व महिबुब मुजावर यांचा मुलगा असलम महिबुब मुजावर यांनी संगणमत करून अब्दुल रशिद शेख व महिबुब मुजावर
यांना मॅक्स मल्टी स्पेशालिटी हॉस्पीटल तर्फे समिन अमिनुद्दीन काझी यांना 1)अब्दुल रशिद म.हनीफ शेख याची मालकीची अविभक्त क्षेत्र 208.15 चौ.मी. व 2) असलम महिबुब मुजावर याचे मालकीची अविभक्त क्षेत्र 138.76 चौ.मी. जांगा हि 60 महिन्याचे लिव्ह अॅन्ड लायसेन्सी करारपत्र नुसार दिलेली आहे.
वरील संपूर्ण जागेची विभागणी नसताना महीबुब अ. करीम मुजावर यांनी त्या जागेवर दुकाने गाळे काढून ते भाडयाने दिले आहेत. तसेच डॉ. असलम मुजावर यांनी 138,76 व [व] अ.रशीद शेख यांनी 208.15 जागा शिल्लक नसताना ती जागा समीन काझी यांचेशी आमचे परस्पर भाडे करार करून हॉस्पीटलला भाडयाने देवून आम्हाला सदर जागेवर येण्यास प्रतिबंध करून शिवीगाळी दमदाटी करीत आहेत. अशा अशयाची फिर्याद पुष्पा चाकोते यांनी सदर बझार पोलीस स्टेशन येथे दाखल केली होती.
यात आरोपींना अटक होईल ह्या भितीपोटी आरोपींनी अँड. संतोष न्हावकर यांच्या मार्फत अटकपूर्व जामीन अर्ज दाखल केला होता. यात आरोपी तर्फे युक्तिवाद करताना अँड.संतोष न्हावकर यांनी जास्त जागेचे खरेदीखत केल्याने फिर्यादीची कोणतीही फसवणूक झालेली नसून सदरचा वाद हा दिवाणी स्वरूपाचा असल्याचे न्यायालयाचे निदर्शनास आणून दिले. सदरचा युक्तिवाद मान्य करून न्यायमूर्तींनी आरोपींना अटकपूर्व जामिनावर मुक्त करणेचे आदेश दिले.
यात आरोपीतर्फे अँड संतोष न्हावकर, अँड वैष्णवी न्हावकर ,अँड राहुल रुपनर,अँड शैलेश पोटफोडे यांनी तर सरकार पक्षातर्फे अँड. दतूसिंग पवार यांनी काम पाहिले.
