सोलापूर ! देशासह राज्यात सध्या महागाई वाढत आहे, हे कुठे तरी थांबले पाहिजे म्हणून आंदोलनाच्या माध्यमातून राग व्यक्त करा, महिला संघटना मजबूत करा राष्ट्रवादी काँग्रेस मध्ये महिलांचा प्रतिसाद व सहभाग वाढत आहे याचे कौतुक वाटते. त्यामुळे आगामी महापालिका निवडणुकीत जास्तीत जास्त नगरसेवक निवडून आणून महापौर राष्ट्रवादीचा करण्यासाठी तयारीला लागा असे आवाहन राष्ट्रवादी काँग्रेसचे प्रदेशाध्यक्ष रुपाली चाकणकर यांनी उपस्थितांना केले.
राज्याचे उपमुख्यमंत्री अजित पवार यांच्या वाढदिवसानिमित्त सोलापूर राष्ट्रवादी महिला काँग्रेसच्या वतीने सोमवार दि. 19 जुलै रोजी शहरातील सुभद्रा मंगल कार्यालयात महिला मेळाव्याचे आयोजन करण्यात आले होते. यावेळी चाकणकर बोलत होत्या.
यावेळी व्यासपीठावर राष्ट्रवादीचे नेते उमेश पाटील, राष्ट्रवादीचे शहराध्यक्ष भारत जाधव, कार्याध्यक्ष संतोष पवार, नगरसेविका सुनीता रोटे, राष्ट्रवादीच्या जिल्हा निरीक्षक दिपाली पांढरे, पश्चिम महाराष्ट्र निरीक्षक भारती शेवाळे, डॉ. दादाराव रोटे यांच्यासह महिला पदाधिकारी उपस्थित होत्या.
चाकणकर म्हणाल्या, देशासह राज्यभरात महागाई वाढत आहे, गॅसचे दर गगनाला भिडले आहेत. पंतप्रधान मोदी यांच्या दाढी सारखे गॅसचे दर वाढत आहेत. हे कुठेतरी थांबले पाहिजे त्यामुळे संघटना म्हणून तुम्ही आवाज उठवला पाहिजे. आंदोलनाच्या माध्यमातून महागाईविरोधात राग व्यक्त करा संघटनांमधून प्रश्न सोडवले पाहिजे म्हणून महिला मेळावा आयोजित केला आहे. कोणतेही प्रश्न असले तरी पहिले आंदोलन सोलापूरमध्ये होते याचे कौतुक वाटते. राष्ट्रवादी काँग्रेसमध्ये महिलांना सन्मान आहे, महिलांचा प्रतिसाद ही वाढत आहे.
आगामी महानगरपालिका नगरपालिका निवडणुकीत जास्तीत जास्त नगरसेवक राष्ट्रवादीतून निवडून आले पाहिजे त्यासाठी तयारी लागा, यंदाचा महापौर राष्ट्रवादीचा झाला पाहिजे यासाठी कामाला लागा, महापौर राष्ट्रवादीचा झाल्यास गुलाल उधळण्यासाठी मला आमंत्रित करावे अशी इच्छा चाकणकर यांनी व्यक्त केली.
उमेश पाटील म्हणाले, राष्ट्रवादी काँग्रेसमध्ये महिलांना सन्मान दिला जातो, सरकारी नोकऱ्यांमध्ये तीस टक्के राखीव देणारा हा पक्ष आहे. दोन देशमुखच्या भांडणामुळे सोलापूरकर कंटाळले आहेत. महिलांनी एकजुटीने काम केल्यास महापालिकेच्या निवडणुकीत महापौर राष्ट्रवादीचा होईल. कार्याध्यक्ष संतोष पवार म्हणाले, पक्ष व संघटना वाढीसाठी मेळावा घेणे गरजेचे आहे, यामुळे राष्ट्रवादी घराघरात पोहोचेल. आगामी महापालिकेच्या निवडणुकीत नक्कीच राष्ट्रवादीला फायदा होईल असेही पवार म्हणाले. राष्ट्रवादीचे शहराध्यक्ष भारत जाधव यांनी मनोगत व्यक्त केले. कार्यक्रमाचे प्रास्ताविक नगरसेविका सुनीता रोटे तर आभार लता ढेरे यांनी मानले.कार्यक्रम यशस्वी करण्यासाठी शहर महिला राष्ट्रवादी आघाडीच्या सर्व महिला पदाधिकारी, कार्यकर्त्यांनी प्रयत्न केले.
