पैलवान जोमात अन् एमआयएम कोमात ; एमआयएमच्या “ऍक्टिव्हिटी”थंडावल्या.

सोलापूर शहरांमध्ये राजकीय वर्तुळात जुलै महिना पाहिला तर आगामी महानगरपालिका निवडणुकीच्या तोंडावर सर्वच पक्षांच्या राजकीय ऍक्टिव्हिटी पाहायला मिळाल्या. काँग्रेस पक्षाने आता आमदार प्रणिती शिंदे यांच्या नेतृत्वाखाली कॉंग्रेस घराघरात, कॉंग्रेस मनामनात ही मोहीम सुरू केली आहे. शिवसेनेने शिव संपर्क अभियानाच्या माध्यमातून सोलापूर शहरातील सर्वच प्रभाग पिंजून काढले. जिल्हाप्रमुख, शहर प्रमुख, विरोधी पक्षनेते सर्वत्र फिरले. भारतीय जनता पार्टी आमदार विजय देशमुख यांच्या माध्यमातून आपल्या विविध विकास कामांच्या भूमिपूजनाच्या माध्यमातून मोर्चेबांधणी करत आहेत.

राष्ट्रवादी काँग्रेसची तर शहरात दिवसेंदिवस ताकत वाढताना दिसत आहे, नुकतेच राष्ट्रवादी काँग्रेसने प्रदेशाध्यक्ष जयंत पाटील यांच्या प्रमुख उपस्थितीत अनेक कार्यकर्त्यांचा प्रवेश कार्यक्रम घेतला यामध्ये एमआयएम नगरसेवक तोफिक शेख यांनी आपल्या अनेक समर्थक कार्यकर्त्यांना राष्ट्रवादी काँग्रेस मध्ये पाठवले. पैलवान यांनी खेळी करत आपला व इतर नगरसेवकांचा प्रवेश मात्र रोखून ठेवला आहे. मुलाला प्रवेश दिला मात्र स्वतः त्या स्टेजवर  अजिबात गेले नाहीत, मात्र शेजारीच राष्ट्रवादी काँग्रेसच्याच संतोष पवार यांच्या दमदार अजितदादा पवार या गीताच्या लॉंचिंगच्या स्टेजवर ते जयंत पाटलांसोबत होते.

प्रवेश केलेल्या कार्यकर्त्यांमध्ये 2 नई जिंदगी, 2 शास्त्री नगर, 2 मौलाली चौक, 2 विजापूर वेस, 2 फॉरेस्ट, 2 बेगम पेठ, 2 पाच्छा पेठ, 2 राहुल गांधी झोपडपट्टी अशा विविध मुस्लिम भागातील कार्यकर्त्यांना तौफिक पैलवानने प्रवेश देत एमआयएमला डोकेदुखी केली. नावालाच एमआयएम नगरसेवक आहेत मात्र पुर्णतः तौफिक शेख हे राष्ट्रवादी काँग्रेसचे झाले आहेत, 

गटनेते रियाज खरादी यांची तर भूमिका कुणालाही न समजणारी आहे, त्यांच्या सुपीक डोक्यात काय चाललंय हे अजूनही एमआयएम शहराध्यक्ष फारूक शाब्दी आणि तौफिक शेख यांना समजले नाही, शाब्दी आले की त्यांच्या कार्यालयात येतात, ते गेले की पैलवान यांना जवळ करतात, ही खरादी यांची “कामचलाऊ” भूमिका त्यांना स्वतःला भविष्यात महापालिका निवडणुकीवेळी त्रासदायक आणि अडचणीची ठरणारी आहे, 

जुलै महिन्यात एमआयएम पक्षाने एक ही ऍक्टिव्हिटी केली नाही, कोणते निवेदन दिसले नाही, आंदोलन नाही, कोणता विशेष कार्यक्रम नाही, नगरसेवक गाझी जहागीरदार यांचा जंगी वाढदिवस  आणि  मेडिकल विंगचा कार्यक्रम सोडला तर महापालिका निवडणुकीच्या दृष्टीने जे अपेक्षित पाहिजे तसे ठोस काही दिसले नाही. एमआयएमची महिला आघाडी तर पहायला सुध्दा मिळत नाही, गॅस दरवाढ, महागाईवर जनता वैतागली आहे, असे असताना कुणी आवाज उठवताना दिसत नाही.