उत्तर सोलापूर तालुक्यातील अकोलेकाटी गावातील एका शेतकऱ्यावर बिबट्याने हल्ला केल्याची घटना समोर आली आहे. भारत गवळी असे या हल्ला झालेल्या शेतकऱ्याचे नाव आहे.
दुपारी 2:30 वाजण्याच्या सुमारास भारत गवळी हे आपल्या शेतात काम करीत होते. त्यादरम्यान शेतातून ते वस्तीवर आले. त्यादरम्यान या बिबट्याने भारत गवळी यांच्यावर हल्ला केला. मात्र कुटुंबातील व्यक्तींनी आरडा ओरड केल्यानंतर बिबट्याने पलायन केले. दरम्यान या हल्ल्यात भारत गवळी हे सुदैवाने वाचले असून दुसरीकडे एका रेडकावरही बिबट्याने हल्ला केला आहे. मात्र हल्ल्यातून बचावलेले गवळी यांच्या म्हणण्यानुसार तो बिबट्या नसून वाघ असल्याचा दावा त्यांनी केला आहे.
घटनास्थळी सोलापूर वनविभागाची टीम पोहोचली असून हल्ल्याबाबत माहिती घेत आहेत. दरम्यान वनपाल यशोदा बोराटे-आदलिंगे यांनी या घटनेबाबत दुजोरा दिला असून बिबट्याच्या शोध घेत असल्याची माहिती त्यांनी दिली. त्यामुळे गेल्या महिन्याभरापासून सुरु असलेल्या या बिबट्याच्या कथित चर्चेला आता पुष्टी मिळाली आहे. त्यामुळे वनविभाग या बिबट्याचा शोध घेऊन त्याला पकडतात का हे पाहणे महत्वाचे ठरणार आहे.
सोलापूर शहरालगत असलेल्या कोंडी गावात दोन दिवसापूर्वी बिबट्यासदृश प्राण्याचे ठसे आढळून आले होते. मात्र ते ठसे बिबट्याचे आहेत की तरसाचे याबाबत वनविभागाने दुजोरा दिला नव्हता. मात्र गुरुवारी पहाटे पुन्हा एकदा बिबट्याच्या पायाचे ठसे आढळून आले आहेत. त्याचबरोबर कोंडीतील एका खासगी गोडाऊनच्या सीसीटीव्हीतही बिबट्या कैद झाल्याचा दावा करण्यात आला आहे.
कोंडी गावात कामासाठी वास्तव्यास असलेले कामगार तानाजी पवार यांनी बिबट्याला पाहिल्याचा दावा केला आहे. पहाटे 5:30 ते 6 च्या दरम्यान कामावर जात असताना आपल्या मागून बिबट्या गेल्याचे त्यांनी सांगितले. त्यानंतर तानाजी पवार यांनी आपल्या मागोमाग येणाऱ्या कामगारांना थांबवून पुढे न जाण्यास सांगितले.
त्याचबरोबर तानाजी पवार यांनी जवळच्या एका गोडाऊनच्या मॅनेजरलाही पाहिलेला प्रकार सांगितला. त्यानंतर त्यांनी सीसीटीव्हीत बिबट्या कैद झाला का हे पाहण्याची विनंती केली. तसेच सदर प्रकाराची माहिती मिळताच वन विभागाचे पथक कोंडी येथे दाखल झाले. त्यांनीही सीसीटीव्हीची पाहणी केली असता त्या सीसीटीव्हीतबिबट्यासदृश प्राणी असल्याचे आढळून आले. दरम्यान वनविभाग आणि वाईल्ड लाईफ कॉन्झर्वेशन सर्कच्या सदस्यांनी या परिसराचे निरीक्षण केल्यानंतर तिथे बिबट्याच्या पायाचे ताजे ठसे आढळून आले. वन विभागाकडून कोंडी गावाच्या शिवारात चार ठिकाणी कॅमेरे लावले आहेत, अकोलेकाटी गावातील हे व्हिडिओ पहा
