आनंद चंदनशिवे सध्या ‘कोठे’ ; बहुजन आघाडीतून ‘वंचित’ झाल्यावर राष्ट्रवादीशी वाढली सलगी ; भूमिपूजन की प्रवेशाची मुहूर्तमेढ

सोलापूर महानगरपालिकेमध्ये आनंद “दादा” चंदनशिवे यांचा एक वेगळाच दबदबा आहे, दादांची काम करण्याची पद्धत अनोखी असल्याने अधिकारी व कर्मचारी त्यांना दपकुनच राहतात, आपल्या प्रभागातील वंचित आणि मागासवर्गीय समाजाचे प्रतिनिधित्व ते करतात त्यांचे प्रश्न, त्या प्रभागातील समस्या तितक्याच ताकदीने मांडण्यात आनंद चंदनशिवे यांचा हातखंडा आहे. बहुजन समाज पार्टीच्या हत्तीच्या चिन्हावर ते सलग तीन वेळा महापालिकेमध्ये वाढत्या मताधिक्याने निवडून आले आहेत. 2019 ची लोकसभा निवडणूक त्यांच्या राजकिय कारकिर्दीला टर्निंग पॉईंट ठरली, वंचित बहुजन आघाडी कडून ऍड प्रकाश आंबेडकर हे निवडणुकीत उतरले, महामानव डॉ बाबासाहेबांचे रक्त असल्याने सारा बहुजन समाज त्यांच्यासाठी एकवटला, इतर पक्षात असलेले सर्व आंबेडकरी नेते बाळासाहेबांच्या नेतृत्वाखाली एकत्र आले, त्यात आनंद चंदनशिवे यांनी ही बसपाची साथ सोडून वंचित आघाडीत सहभागी झाले, लोकसभा निवडणूक झाली, सर्व नेते लांब पळून गेले मात्र चंदनशिवे हेच आंबेडकरांच्या जवळ राहीले, त्यावेळी एका हत्तीपेक्षा प्रकाश आंबेडकर या नावातील हजारों हत्तीचे बळ त्यांना मिळाल्याचा आनंद मिळाला, सोलापूर शहर व जिल्ह्यातील वंचित बहुजन आघाडी हा पक्ष दादांच्या ताब्यात आला, दादांनी विधानसभा निवडणूक लढवली मात्र वंचितची मजल कुठपर्यंत आहे हे विधानसभेत दिसून आले, 

दादांनी संपूर्ण पक्ष ताब्यात घेण्याचा प्रयत्न केला, ती त्यावेळची गरज होती, पण  खटके उडू लागले “जुने जाणते” नेते नाराज झाले, आनंद चंदनशिवेना लोक प्रेमाने दादा म्हणतात, दादा या शब्दाचा अर्थ वेगळा निघू लागला, प्रेमाचा ‘दादा’ हा शब्द दादा’गिरी’त बदलल्याचे अनेकांना वाटले. पंढरपूर मंगळवेढा पोटनिवडणुकीत चित्र स्पष्ट झालं श्रद्धेय बाळासाहेब आंबेडकर यांच्या कडूनच आपल्याकडे दुर्लक्ष झाल्याचे लक्षात आल्यानंतर नाराज झालेल्या चंदनशिवे यांनी आपला मोर्चा तूर्त ‘मामा’कडे वळवला.

राष्ट्रवादीची दादागिरी वाढत असल्याचे लक्षात येताच हा दादा गप्प बसला नाही त्यांनी मामांशी सलगी वाढवली, भरणे मामांनी चंदनशिवे यांना दादा आता आमच्या पक्षात या, पक्षाचे काम करा अशी ऑफर देऊन टाकली, या ऑफर देण्यामागे बरेच राजकारण आहे. त्यानंतर आनंद चंदनशिवे यांनी भविष्यातील चित्र डोळ्यासमोर ठेवून महेश अण्णांशी जवळीक साधली आहे, दोघांच्या वारंवार भेटीगाठी,  चर्चा होत असल्याची माहिती समोर आली. आता फक्त प्रवेशाचा मुहूर्त बाकी राहिल्याचे बोलले जात आहे.

पालकमंत्री भरणे मामा यांच्या उपस्थितीत आनंद चंदनशिवे यांनी केगाव या ठिकाणी सिमेंट काँक्रिट रस्त्याचा भूमिपूजन सोहळा घेतला आहे हा भूमिपूजन सोहळा नसून राष्ट्रवादी काँग्रेस प्रवेशाची मुहूर्तमेढ तर नाही ना असा सवाल आता राजकीय वर्तुळात उपस्थित केला जातोय. मात्र हत्तीच्या जोरावर हॅटट्रिक साधणाऱ्या आनंद चंदनशिवे यांनी समाजाचं हित पाहता भविष्यातील राजकीय चाल सावध पद्धतीनेच खेळावी अशीही अपेक्षा समाज बांधवांमधून उपस्थित होत आहे.