सोलापूर जिल्हा परिषदेचे मुख्य कार्यकारी अधिकारी दिलीप स्वामी यांनी सोलापूर जिल्ह्यात कोरोना संसर्गामुळे शाळा बंद होत्या मात्र त्यांनी आपल्या संकल्पनेतून झेडपीच्या शाळा स्वच्छ व सुंदर करण्याचा उपक्रम हाती घेतला. यात लोकसहभाग घेतल्याने या उपक्रमाला चळवळीचे स्वरूप प्राप्त झाले. लोकसहभागातून एक नाही दोन नाही तर तब्बल 6 कोटी रुपये जमा झाले त्यातून अडीच हजार शाळा स्वच्छ व सुंदर करण्यात आल्या आहेत. शाळेचे हे रुपडे पाहून विद्यार्थ्यांसह पालकांनी सुध्दा तोंडात बोटे घातली आहेत. हा उपक्रम इतका चर्चेचा झाला की,याची राज्यस्तरावर नोंद घेण्यात आली आहे. आता राज्यातील सर्व जिल्हा परिषदेच्या मुख्य कार्यकारी अधिकारी यांच्यासमोर झेडपी सीईओ दिलीप स्वामी यांना प्रेझेन्टेशन देण्यासाठी राज्याच्या शिक्षणमंत्री वर्षा गायकवाड यांनी निमंत्रण दिले आहे.
सोमवारी जिल्हा परिषदेची सर्वसाधारण सभा झाली या सभेत राष्ट्रवादी काँग्रेसचे सदस्य उमेश पाटील यांनी याबद्दल मुख्य कार्यकारी अधिकारी स्वामी यांच्या अभिनंदनाचा ठराव मांडला, या ठरावाला भाजपचे आनंद तानवडे यांनी अनुमोदन दिले. तसेच संपूर्ण जिल्हा परिषद सदस्यांच्या वतीने ज्येष्ठ सदस्य बळीराम साठे यांच्या हस्ते सत्कार घडवून आणला.
यावेळी सत्काराला उत्तर देताना दिलीप स्वामी यांनी कोरोना काळात शाळा बंद होत्या, मात्र स्वच्छ व सुंदर शाळा करण्याचा निर्णय घेतला मी स्वतः 60 शाळेत गेलो, राज्यस्तवरच्या बैठकीत 3 कोटी आदर्श शाळासाठी देणार होते मात्र मी सांगितले आम्ही अगोदरच 6 कोटी जमा केलेत, त्याचे कौतूक झाले, आता केवळ शाळा स्वच्छतेवर थांबणार नाही तर गुणवत्तेवर भर देणार त्यासाठी शिक्षकांच्या निबंध स्पर्धेतील 110 निबंधाचा अभ्यास करून त्याचा उपयोग जिल्हा गुणवत्ता वाढीसाठी करणार आहोत.
त्याच दिवशी दुपारी झालेल्या जिल्हा नियोजन समितीच्या बैठकीत स्वतः पालकमंत्री दत्ता मामा भरणे यांनी जिल्हा परिषदेच्या स्वच्छ व सुंदर शाळेचा उपक्रमाचे कौतुक करत हा उपक्रम आता राज्यभर राबवला जाणार असल्या प्रकरणी सीईओ दिलीप स्वामी यांचे अभिनंदन केले, त्याचबरोबर उमेश पाटील यांनी जिल्हा नियोजन समितीच्या बैठकीत शाळा स्वच्छ व सुंदर केल्याप्रकरणी मुख्य कार्यकारी अधिकारी दिलीप स्वामी यांच्या अभिनंदनाचा ठराव मांडला.
