सोलापूर महापालिकेच्या स्थायी समिती सदस्यपदी महेश कोठे यांनी खेळी करत आपल्या गटातून विरोधी पक्षनेते अमोल शिंदे व मनोज शेजवाळ यांना संधी दिली. त्यावेळी शिवसेनेच्या जिल्हाप्रमुख पुरुषोत्तम बरडे व जिल्हाप्रमुख गणेश वानकर हे नाराज झाले.
त्यांनी स्थायी समिती सदस्य निवड प्रक्रियेत पक्षांतर्गत झालेल्या राजकीय डावपेचा मध्ये ज्या नगरसेवकांनी पक्षाच्या वरिष्ठ नेत्याचा आदेश डावलला म्हणून पक्षातून हकालपट्टी करणार असल्याचे संकेत दिले होते , हे कळताच नगरसेवक मनोज शेजवाळ यांनी पत्रकार परिषद घेवून अनेक दिवसांची मनातील खदखद व्यक्त करताना जिल्हाप्रमुख पुरूषोत्तम बरडे यांच्यावर गंभीर आरोप केले.
त्यानंतर शेजवाळ महेश कोठे यांच्या जास्त संपर्कात आले, कोठे यांनी शेजवाळ यांना स्थायी समिती सभापती पदाचा उमेदवार केले होते त्यानंतर मनोज शेजवाळ हे शिवसेनेपासून लांबच आहेत तेव्हापासूनच ते महेश कोठे यांच्या नेतृत्वात राष्ट्रवादी काँग्रेसकडून आगामी महापालिका निवडणूक लढवतील अशी चर्चा ऐकण्यास मिळत होती.
दरम्यान शुक्रवारी पालकमंत्री दत्तात्रय भरणे हे नियोजन भवनात बैठक घेत होते त्यावेळी नगरसेवक मनोज शेजवाळ यांची उपस्थिती होती ते महेश कोठे, कार्याध्यक्ष संतोष पवार, गटनेते किसन जाधव, नगरसेवक तोफिक शेख, नगरसेवक आनंद चंदनशिवे यांच्यासोबत बसून होते. त्याच वेळी काँग्रेसच्या नगरसेविका फिरदोस पटेल व शौकत पठाण यांचीही उपस्थिती होती. ते दोन्ही नेते महेश कोठे यांच्या पाठीमागे असल्याने त्यांची उपस्थिती ही पत्रकारांमध्ये चर्चेचा विषय होता. दरम्यान त्यांनी पालकमंत्री मामांना निधी देण्यासाठी निवेदन दिल्याचं दिसून आले. नियोजन समितीच्या सदस्य असताना ही केवळ जवळच्या आणि पुढे पुढे करणाऱ्यांना निधी दिला जातोय अशी नाराजी पटेल यांची होती.
मनोज शेजवाळ हे यापूर्वी दोन वेळा देगाव नाका व देगाव या परिसरातून दोन वेळा शिवसेनेच्या तिकिटावर नगरसेवक झाले आहेत त्यांचे वानकर परिवाराचे चांगले संबंध होते मात्र स्थायी समितीच्या सदस्य निवडीनंतर हे संबंध काहीसे बिघडले आता शेजवाळ हे महेश कोठे यांच्या नेतृत्वात काम करत असल्याचे चित्र आहे.
परंतु महापालिकेची निवडणूक शेजवाळ हे शिवसेना की राष्ट्रवादी या पक्षाकडून लढवतात याचेही चित्र अजूनही स्पष्ट झालेले नाही. जरी शेजवाळ हे राष्ट्रवादी काँग्रेसमध्ये गेले तर त्यांना कोठे कोणत्या प्रभागातून उमेदवारी देतात याकडेही सोलापूरच्या राजकीय वर्तुळाचे लक्ष लागून राहिल आहे.
