सोलापूर (प्रशांत कटारे)पालकमंत्री दत्तात्रय भरणे मामा यांचा दौरा असला की सर्वाधिक जवळ असतात ते सध्या राष्ट्रवादी काँग्रेसच्या वाटेवर असलेले नगरसेवक आनंद चंदनशिवे. चंदनशिवे दादा भरणे मामांचे लाडके भाचे झाले आहेत, जाताना त्यांच्या गाडीत बसतात. मामाच्या इतके जवळ असतात की कुणी निवेदन देत असेल, कुणाचा सत्कार होत असेल, कुणाचे पत्र द्यायचे असेल तर ते शेजारी असतातच.
शुक्रवारी तर पालकमंत्री मामांनी काही पत्रकारांना वन विभागाकडून आलेली भेटवस्तू दिली (दिवाळीला कोणतीही जाहिरात दिली नाही), पालकमंत्र्यांच्या हस्ते भेट वस्तू मिळत असल्याने पत्रकारांचे फोटो काढण्यात आले त्या फोटोच्या मध्ये केवळ चंदनशिवे हेच होते. याचवेळी माजी महापौर महेश कोठे, तौफिक शेख, मनोज शेजवाळ या नेत्यांनी काही निधी देण्याचे पत्र पालकमंत्री दत्तात्रय भरणे मामा यांच्याकडे दिले.
महापालिका, नगरपालिकेच्या विविध विकास योजनांच्या कामांची यादी तयार झाली असल्याने मामा यांनी आता बस करा निधी शिल्लक नाही याद्या तयार झाल्यात असे नेत्यांना सांगितले, तेव्हा चंदनशिवे यांनी एक पत्र किसन जाधव यांचे घेऊन मामाच्या जवळ देण्याचा प्रयत्न केला, तेव्हा बस करा असे मामा म्हणाले मात्र पत्रकारांमधून मामा हे पत्र आनंद दादा यांचे आहे तुम्हाला घ्यावेच लागेल अशी भाषा समोर आली असता मामा यांनी हास्य केले आणि ते पत्र घेऊन सही करत संबंधित अधिकाऱ्याकडे दिले.
तेव्हा एका ज्येष्ठ पत्रकाराने मामा, सध्या आनंद दादा म्हणजे जिल्ह्याचे “प्रति पालकमंत्री” झाल्याचं चित्र आहे. त्यावेळी चंदनशिवे यांनी पण भरणे मामा यांना सोलापुरात माझ्याच मतदारसंघातून यावे लागते असे म्हणताच उपस्थितांमध्ये एकच हशा पिकला.
बैठक संपल्यानंतर चंदनशिवे आणि किसन जाधव हे पालकमंत्री भरणे मामाच्या गाडी मध्ये बसून निघाले. विकास कामांना निधी कसा मिळवायचा यात चंदनशिवे माहीर आहेत. जेव्हापासून आनंद चंदनशिवे पालकमंत्री दत्तात्रय भरणे यांच्या संपर्कात आले आहेत तेव्हापासून सोलापूर मधील नगरसेवकांमध्ये सर्वाधिक विकास निधी हा चंदनशिवे यांनी पालकमंत्र्यांकडून घेतल्याची चर्चा आहे.
