सोलापूर : सोलापूर अक्कलकोट रोडवरील कुंभारी नजीक प्रवासी वाहतूक जीप पलटी होऊन झालेल्या भीषण अपघातात मध्ये पाच जण जागीच ठार झाले. आणखी काही जणांची प्रकृती गंभीर असून इतर सात प्रवासी जखमी झाले आहेत. ठार झालेल्या पाच जणांपैकी चार जणांची ओळख पटली असून हे चारही मयत अक्कलकोट तालुक्यातील रहिवासी आहेत. एका महिलेची मात्र ओळख पटली नाही, तर आठ जणांवर सिव्हिल हॉस्पिटलमध्ये उपचार सुरू आहेत.
अपघाताची माहिती मिळताच पोलिस अधीक्षक तेजस्वी सातपुते यांनी सिव्हिल हॉस्पिटलमध्ये जाऊन जखमींची विचारपूस केली त्याचबरोबर सोलापूर जिल्हा परिषदेचे पक्षनेते अण्णाराव बाराचारे यांनी अक्कलकोट मतदार संघाचे आमदार सचिन कल्याण शेट्टी यांचे स्वीय सहाय्यक आसिफ शेख यांच्यासोबत जाऊन सर्व जखमींची विचारपूस करत धीर दिला आहे.
राज्यातील एसटी कर्मचाऱ्यांनी आपल्या प्रलंबित मागण्यां मंजूर करण्यासाठी मागील अनेक दिवसांपासून बेमुदत संप केल्याने सर्व एसटी बंद आहेत त्यामुळे अवैध प्रवासी वाहतूक करणाऱ्यांचा व्यवसाय जोरात आहे मात्र अखेर या अवैध प्रवासी वाहतुकीने पाच निष्पाप लोकांचा बळी मंगळवारी घेतला. पक्षनेते बाराचारे यांनी माहिती दिली की, आमदार सचिन कल्याणशेट्टी हे सोलापुरात नसल्याने त्यांच्या सूचनेनुसार त्वरित आम्ही सिविल हॉस्पिटलला भेट दिली पाच मयत पैकी तीन मयत हे अक्कलकोट तालुक्यातील ब्यागेहळ्ळी येथील असून एक मयत बणजगोळ येथील आहे सध्या सिव्हिल हॉस्पिटलमध्ये तिघांवर उपचार सुरू असून गंभीर असलेल्या व्यक्तीला अश्विनी हॉस्पिटलमध्ये उपचारासाठी हलवण्यात आले आहे.
