सोलापूर : महाराष्ट्राचे पहिले मुख्यमंत्री यशवंतराव चव्हाण यांच्या पुण्यतिथीनिमित्त सात रस्ता चौकातील त्यांच्या पूर्णाकृती पुतळ्यास अभिवादन करण्यासाठी राष्ट्रवादी काँग्रेस पक्षाचे पदाधिकारी कार्यकर्ते एकत्र झाले होते. याच वेळी काँग्रेस पक्षाच्या आमदार प्रणिती शिंदे, शहराध्यक्ष प्रकाश वाले हे सुद्धा अभिवादन करण्यासाठी त्या ठिकाणी आले. महाविकास आघाडीतील दोन्ही पक्ष एकत्रित आल्याने सर्वांनी मिळून अभिवादन केले.
आमदार प्रणिती शिंदे यांचे निवासस्थान जनवात्सल्य हे बाजूलाच असल्याने त्यांनी सर्वांना चहाचे निमंत्रण दिले. आमदारांच्या निमंत्रणाला मान देऊन राष्ट्रवादीचे शहराध्यक्ष भारत जाधव, कार्याध्यक्ष संतोष पवार, माजी महापौर मनोहर सपाटे, माजी शहराध्यक्ष महेश गादेकर, शफी इनामदार ही प्रमुख नेते मंडळी सर्व कार्यकर्त्यांसह आमदार ताईंच्या निवासस्थानी चहाला गेले त्याठिकाणी ‘चाय पे चर्चा’ मध्ये सोलापूर महानगरपालिका निवडणुकीच्या पार्श्वभूमीवर बऱ्याच गप्पा रंगल्या.
दोन्ही पक्ष आणि शिवसेना राज्यामध्ये सत्तेत असल्याने सोलापूर महापालिकेतील सत्ताधारी भारतीय जनता पक्षाच्या विरोधात तिने पक्षांनी एकत्र येऊन ही निवडणूक लढवण्यास निश्चितच आपण भारतीय जनता पार्टीला हरवू शकतो असा सूर कॉंग्रेसचे शहराध्यक्ष प्रकाश वाले आणि राष्ट्रवादीचे शहराध्यक्ष भारत जाधव यांच्या तोंडून निघाला. मात्र काँग्रेस पक्षांने एकला चलो रे ची भूमिका स्पष्ट केल्याने आणि सत्ता मिळवण्याच्या वाटेने वाटचाल करणाऱ्या राष्ट्रवादी काँग्रेसच्या भूमिकेने निवडणूकीत एकत्र येण्याची भाषा केवळ वरवरचीच होती का? असाही प्रश्न सर्वसामान्यांना पडणार आहे.
एकूणच महेश कोठे यांच्या ताब्यात सोलापूर शहराचा राष्ट्रवादी पक्ष गेल्याने पक्षांतर्गत धुसफूस कायम आहे. जरी पक्षाचे नेते शरद पवार व उपमुख्यमंत्री अजितदादा यांनी महेश कोठे यांच्या नेतृत्वाखाली काम करण्याच्या सूचना दिल्या असल्या तरी नुकत्याच झालेल्या एका राष्ट्रवादी काँग्रेसच्या बैठकीत ही धुसफूस बाहेर निघाली असल्याची माहिती समोर आली आहे आणि विशेष म्हणजे महेश कोठे यांना अजूनही पक्षांतर्गत विरोध असल्याची चर्चा राष्ट्रवादी काँग्रेसच्या कार्यकर्त्यांमधून ‘दबक्या’ आवाजात ऐकण्यास मिळते.
