मुंबई : सोलापूर संपूर्ण चिंचोळी औद्योगिक वसाहत डी प्लस झोनमध्ये समाविष्ट केल्यानिमित्त आ. प्रणिती शिंदे यांचा सोलापूर इंडस्ट्रिज असोसिएशनकडून सत्कार करण्यात आला. सोलापूरातील सर्वात मोठी चिंचोळी औद्योगिक वसाहत (MIDC) जवळपास 2500 एकरात विस्तारलेली, अनेक लहान, मोठे उद्योग ज्यामुळे सोलापूर तसेच आसपासच्या गावामधील लोकांना रोजगार उपलब्ध झाले.
अशी ही औद्योगिक वसाहत शासकीय धोरणामुळे डी व डी प्लस श्रेणीमध्ये विखुरली गेली होती. वास्तविकपणे ही एकच औद्योगिक वसाहत पण दोन तालुक्यामध्ये वसलेली असल्यामुळे दोन वेगवेगळ्या श्रेणीमध्ये विभाजन झाले ज्यामुळे एकाच ठिकाणी असलेल्या उद्योगांमध्ये शासनाकडून मिळणाऱ्या सवलतीमध्ये दुजाभाव निर्माण झाला होता व त्याचा परिणाम येथील उद्योग आणि रोजगारावर होत होता. येथील इंडस्ट्रिज असोसिएशनने हे प्रकरण शासनाच्या निदर्शनास आणून दिले परंतू यावर तोडगा निघत नव्हता. सोलापूरचे आमदार प्रणिती शिंदे यांच्याकडे या प्रकरणाची माहिती दिल्यानंतर त्यांनी तातडीने उद्योग विभागाच्या प्रधान सचिवांकडे या संदर्भात पाठपुरावा केल्यामुळे संपूर्ण चिचोळी औद्योगिक वसाहतीला डी प्लस झोनमध्ये समाविष्ट करण्यात आले.
त्यानिमित्ताने सोलापूर इंडस्ट्रिज असोसिएशनकडून आमदार प्रणिती शिंदे यांचा सत्कार करण्यात आला. यावेळी बोलताना असोसिएशनचे अध्यक्ष डी. राम रेड्रडी म्हणाले कि प्रणिती शिंदे वैयक्तिकरित्या या प्रकरणात लक्ष घातल्यामुळे येथील उद्योगावर असलेले संकट टळले आहे. त्यांनी शासनस्तरावर हे प्रकरण व्यवस्थितपणे हाताळल्यामुळे सोलापूरच्या औद्योगिक प्रगतीस खुप मोठा हातभार लागला असल्याने त्यांनी नमुद केले.
यावेळी सोलापूर इंडस्ट्रिज असोसिएशनचे अध्यक्ष डी. राम रेड्रडी, शरदकृष्ण ठाकरे, वासुदेव बंग व इतर बहुसंख्य उद्योजक उपस्थित होते.
