पंढरपूर : घरात घुसून चोरी तर केलीच ,पण जाता जाता घरही पेटवून दिल्याची घटना, पंढरपूर तालुक्यातील इसबावी येथे घडली आहे. या घटनेने पंढरपूर शहरातील नागरिकांमध्ये भीतीचे वातावरण पसरले आहे.
पंढरपूर शहर आणि परिसरात दररोजच होणार्‍या चोर्‍यांनी नागरिकांना भंडावून सोडले आहे. शहर अथवा उपनगरात चोरीच्या घटना घडताना दिसत आहेत. भाविकांच्या चीजवस्तू सुरक्षित नाहीत की नागरिकांच्या घरातील सोने-नाणे ही सुरक्षित राहिलेले नाही. दारात लावलेल्या दुचाकीही चोरीस जात आहेत. या प्रकारांनी नागरिक भयभीत झाले आहेत. अशा परिस्थितीत इसबावी येथे एक वेगळीच घटना समोर आली आहे . येथील शिवाजीनगर परिसरात राहणारे स्टेट बँकेतील निवृत्त कर्मचारी अरुण घोडके यांच्या घरात चोरट्यांनी घुसून चोरी केली आहे. बुधवारी मध्यरात्रीनंतर घडलेल्या या प्रकाराने परिसरात खळबळ उडाली आहे . हा प्रकार केवळ चोरीचा आहे की यामागे अजून काही दडलेले आहे याची उकल पोलीस तपासातच होणार आहे.
अरुण घोडके हे कुटुंबासह परगावी गेले असता हा प्रकार घडला आहे. बुधवारी मध्यरात्री त्यांच्या घरात चोर घुसले आणि चोरी करून निघून जाताना घर पेटवून दिले .या आगीमुळे घरातील साहित्य, किमती सामान जळून खाक झाले आहे .पंढरपूर नगरपालिकेच्या अग्निशामक दलाने तातडीने धाव घेत ही आग विझवली, परंतु तोपर्यंत घरातील मोठे नुकसान व्हायचे ते झाले होते.अरुण घोडके यांनी या घटनेबाबत पंढरपूर शहर पोलिसात फिर्याद दाखल केली आहे. त्यानुसार पोलिस अधिक तपास करत आहेत.
अग्निशामक दलाच्या वाहनाची पळापळ पाहून सकाळीच काही घडल्याची जाणीव झाली होती परंतु या भागात चौकशी करूनही नेमकी माहिती मिळत नव्हती.इसबावी परिसरात अनेकांना या घटनेची माहिती मिळाली नव्हती पण जेव्हा ही घटना समजली तेव्हा सगळ्यांनाच धक्का बसला आहे घरात कोणी नाही हे पाहून चोरी होऊ शकते परंतु जाताना घर पेटवून देण्याची काय कारण असू शकते असा प्रश्न सर्वांनाच पडला आहे चोरीचा हा नवा प्रकार पाहून अनेकांना हादरा बसला आहे या प्रकाराचा लवकरच छडा लागण्याची गरज असल्याचे मत नागरिकांकडून व्यक्त होत आहे.
