सोलापूर : सण – उत्सवात व्यापाऱ्यांना, फेरीवाल्यांना विनाकारण त्रास होऊ नये याची काळजी पोलिस आणि प्रशासनाने घ्यावी, अशी भूमिका माजी पालकमंत्री आ. विजयकुमार देशमुख यांनी मांडली. आगामी सणांच्या पार्श्वभूमीवर आ. देशमुख यांनी मंगळवारी शासकीय विश्रामगृहावर प्रशासनासमवेत समन्वय बैठक घेतली.
हिंदूंचे सण उत्सव पार्श्वभूमीवर लोकमान्य टिळक चौक ते महात्मा श्री बसवेश्वर चौक परिसरातील पारंपारिक बाजारपेठेतील व्यापाऱ्यांची बैठक आमदार विजयकुमार देशमुख यांनी मनपा व पोलिस वाहतूक प्रशासनासोबत नियोजन बैठक घेतली.
या बैठकीस सोलापूर महानगपालिकेचे अतिरिक्त आयुक्त नितीन मोरे व वाहतूक शाखेचे पोलिस निरीक्षक धनाजी शिंगाडे यांची प्रमुख उपस्थिती होती. या बैठकीत परंपरेप्रमाणे साजरा होणाऱ्या सण – उत्सव काळातील बाजरपेठेतील श्री गणेश मूर्ती स्टॉल, पूजा साहित्य स्टॉल, मिठाई, हार फुले आदींसह सर्वच व्यापारी व फेरीवाले यांच्या सर्व अडचणी व सुविधा यांवर या बैठकीत चर्चा करण्यात आली.
यावेळी आमदार देशमुख म्हणाले, प्रशासनाने नियमांचे पालन करावे. मात्र व्यवसाय करणाऱ्या व्यापारी व फेरीवाल्यांना नाहक त्रास देऊ नये. त्रास दिल्यास कदापी सहन करणार नाही. यावेळी सोलापूर महानगपालिकेचे अतिरिक्त आयुक्त नितीन मोरे व वाहतूक शाखेचे पोलिस निरीक्षक धनाजी शिंगाडे यांनी व्यापाऱ्यांना संपूर्ण सहकार्य करण्याचे आश्वासन दिले.
यावेळी भाजपचे शहराध्यक्ष नरेंद्र काळे, माजी सभागृहनेते शिवानंद पाटील, संजय कोळी, माजी नगरसेवक अमर पुदाले, प्रसाद कुलकर्णी, किसन गर्जे, किरण पवार व्यापारी भैय्या दास, उमेश डोईजोडे, अर्जुन सिद्धे, मंठाळकर, गवई आदींसह व्यापारी व फेरीवाले यांची मोठ्या संख्येने उपस्थिती होती.
