सोलापूर : काँग्रेस पक्षाचे प्रदेशाध्यक्ष नाना भाऊ पटोले यांच्या पूर्वनियोजित दौऱ्याची आढावा बैठक वरिष्ठ उपाध्यक्ष सुरेश हसापुरे व दक्षिण तालुका अध्यक्ष हरीश पाटील यांच्या प्रमुख उपस्थितीत शासकीय विश्राम गृहावर संपन्न झाली. सोलापूर शहर जिल्हा कॉंग्रेस कार्यकर्ता मेळाव्यास मार्गदर्शन करण्यासाठी महाराष्ट् प्रदेश कॉंग्रेस कमिटीचे अध्यक्ष नाना पटोले हे रविवारी सोलापूर जिल्हा दौऱ्यावर येत आहेत.
त्यांच्या दौऱ्याच्या यशस्वीतेसाठी महाराष्ट्र प्रदेश कॉंग्रेसच्या कार्याध्यक्षा तथा शहर मध्यच्या आमदार प्रणिती शिंदे, माजी मंत्री सिद्धाराम म्हेत्रे व जिल्हाध्यक्ष धवलसिंह मोहिते पाटील यांनी सोपविलेल्या जबाबदारी पार पाडण्यासाठी सोलापूर जिल्हा कॉंग्रेसचे वरिष्ठ उपाध्यक्ष सुरेश हसापुरे व दक्षिण सोलापूर तालुक्यातील सर्व आजी माजी सरपंच, सोसायटी चेअरमन, सर्व फ्रंटलचे पदाधिकारी यांची बैठक घेऊन रविवारचा कार्यक्रम यशस्वी करण्यासह दक्षिण तालुक्यातून हजारो कार्यकर्ते उपस्थित राहण्याचे आवाहन करण्यात आले. यावेळी दक्षिण तालुका कॉंग्रेसचे अध्यक्ष हरीश पाटील, महाराष्ट्र प्रदेश काँग्रेस सचिव पंडित सातपुते यांची प्रमुख उपस्थिती होती.
