अय्यो ! आता कस रे बाबा, चार्ज गेला की, तेव्हा झेडपी सदस्यांनी वाचवले होते ; आरोग्यच्या ‘डॅम’चा पदमुक्त
जिल्हा आरोग्य विभागात कायमच वादग्रस्त असलेल्या जिल्हा लेखा व्यवस्थापक (डॅम) पदाचा पदभार वैशाली थोरात यांच्याकडून काढून घेण्यात आला आहे. जिल्हा आरोग्य अधिकारी डॉ सतीश कोपूरवाड यांनी याबाबत माहिती दिली. थोरात यांच्या कामकाजाबाबत सुरू असलेल्या चौकशीच्या पार्श्वभूमीवर हा निर्णय घेण्यात आल्याचे डॉ. कोपूरवाड यांनी सांगितले आहे.
दिनांक 3 ऑगस्ट रोजी राज्याच्या राष्ट्रीय आरोग्य अभियान आयुक्त यांनी पत्र काढून सोलापूर जिल्ह्यासह परभणी, सातारा, नांदेड, जळगाव, ठाणे, वाशिम या जिल्ह्यातील अर्थसंकल्प व वित्त अधिकारी यांना स्वतःच्या पदाचा कार्यभार सांभाळून जिल्हा लेखा व्यवस्थापक पदाचा कार्यभार अतिरिक्त सांभाळण्याच्या सूचना देण्यात आले आहेत. सोलापूर जिल्हा लेखा व्यवस्थापक पदाचा कार्यभार सांगली जिल्ह्याचे महेंद्र खोत यांच्याकडे देण्याच्या सूचना करण्यात आल्या आहेत.
कार्यभार हस्तांतरणामध्ये खालील बाबींचा समावेश राहील.
सर्व वित्तीय व प्रशासकीय नस्ती.
प्रलंबित वित्तीय प्रकरणे.
निधी वितरणाशी संबंधित अभिलेखे.
लेखा अभिलेखे व वित्तीय अहवाल.
ई-Office, PFMS, IFMS तसेच इतर संगणकीय प्रणालींचे लॉगिन, User ID, Password
इतर सर्व प्रशासकीय व वित्तीय नस्ती व अभिलेखे व कार्यालयीन साहित्य इत्यादी
सोलापूर जिल्हा परिषदेमध्ये गेल्या काही काळापासून कंत्राटदारांची बिले वेळेत मंजूर न होणे, सोशल मीडियाच्या देयकांचा निपटारा रखडणे, विविध योजनांच्या आर्थिक प्रस्तावांना विलंब होणे, तसेच रुग्णवाहिका चालकांच्या वेतन वितरणात अडथळे निर्माण झाल्याच्या तक्रारी सातत्याने समोर येत होत्या.
प्राप्त तक्रारीनुसार चौकशी सुरू असून, चौकशी वेळी पदावर राहणे योग्य नसल्याने थोरात यांचा सोमवारी पदभार काढून घेतला आहे. वरिष्ठ अधिकाऱ्यांनी ही कारवाई केली असून, यासंबंधी पर्यायी व्यवस्था लवकरच केली जाणार असल्याचे जिल्हा आरोग्य अधिकारी डॉक्टर सतीश कोपूरवाड यांनी सांगितले.
काही वर्षांपूर्वीही वैशाली थोरात यांची बदली करण्यात आली होती. परंतु मागच्या बॉडीतील काही सदस्यांनी त्यांची बाजू घेऊन त्यांना पुन्हा जिल्हा परिषदेमध्ये जॉईन करून घेतले होते.
