विधान परिषदेच्या रणधुमाळीत कुठे आहेत राजकीय चाणक्य ? वाढदिनी स्पेशल रिपोर्ट
तब्बल चार वर्षाच्या प्रतीक्षेनंतर स्थानिक स्वराज्य संस्थांच्या सदस्यांमधून विधान परिषदेचा आमदार निवडून दिला जाणार आहे. सत्ताधारी भाजपकडे सर्वाधिक मते असल्याने त्यांच्याकडून इच्छुकांची संख्या वाढली आहे. पण विरोधात सुद्धा तितकीच मते आहेत. त्यात सत्तेतीलच शिवसेना आणि राष्ट्रवादी काँग्रेसची मोठी मते आहेत.
पालकमंत्री जयकुमार गोरे, आमदार सचिन कल्याणशेट्टी यांच्या नेतृत्वाखाली ही निवडणूक होत आहे, या दोन्ही नेत्यांना जुळवाजुळव करावी लागणार आहे.
यापूर्वी झालेली विधान परिषदेची निवडणूक आठवत असेल तर त्या निवडणुकीत अशी जुळवा जुळव करण्यामध्ये ज्यांची सोलापूरच्या राजकारणात मास्टरमाइंड आणि चाणक्य म्हणून ओळख आहे ते सुरेश हसापुरे यांच्या नावाचा आवर्जून उल्लेख होतो. संख्याबळ नसतानाही प्रशांत परिचारक हे विजयी झाले होते.
सुरेश हसापुरे यांच्या नावाशिवाय सोलापूरचे राजकारण पूर्ण होऊ शकत नाही. कारण त्यांच्या चाणक्यनीतीने कोणी स्वप्नात विचार केले नव्हते ती मंडळी मोठमोठे राजकीय पदे भोगली आहेत.
सदस्य संख्या नसताना जिल्हा परिषदेचे अध्यक्ष करण्यात, संख्या बळ नसताना तत्कालीन पालकमंत्र्यांना बाजार समितीच्या सभापती खुर्चीवर बसवले. काही नेत्यांना जिल्हा मध्यवर्ती बँकेचे संचालक करण्यात आणि त्यानंतर जिल्हा परिषदेमध्ये सभापती पदाच्या निवडीत सुद्धा हसापूरे यांची भूमिका महत्त्वपूर्ण ठरली होती.
प्रणिती शिंदे यांच्या खासदारकीचे नियोजन हसापुरे यांनीच यशस्वी करून दाखवले. गेल्या वर्षी झालेल्या बाजार समितीच्या निवडणुकीत सुद्धा हसापूरे यांनीच सचिन कल्याणशेट्टी, दिलीप माने यांना एकत्र आणून बाजार समितीवर आपले वर्चस्व सिद्ध केले. दूध संघ असो की जिल्हा मध्यवर्ती बँक किंवा बाजार समिती या सहकार क्षेत्रातील मोठ्या निवडणुकीचे प्लॅनिंग हसापूरे हेच यशस्वी करतात.
रणजितसिंह मोहिते पाटील, समाधान आवताडे, संजय मामा शिंदे, प्रशांत परिचारक, राजा राऊत, सचिन कल्याणशेट्टी, विजयकुमार देशमुख, सिद्धाराम म्हेत्रे, दिलीप माने या बड्या नेत्यांसोबत असलेली हसापुरे यांची मैत्री, सुशीलकुमार शिंदे यांच्याशी असलेले कौटुंबिक संबंध त्यामुळे सर्वपक्षीय मित्र म्हणून ही त्यांची ओळख आहे.
सध्या ही विधान परिषद निवडणूक जरी भाजपला सोपी वाटत असली तरी तितकी सोपी नाही. आकडेवारी नुसार भाजप मजबूत आहे पण भाजपात गटबाजी असल्याने कुरघोड्या होण्याची शक्यता आहे. म्हणून विरोधात एकनाथ शिंदे यांचा उमेदवार जर आला तर फाईट होईल. तेव्हा सुरेश हसापुरे यांच्या सारख्या नेत्यांची निश्चितच जुळवाजुळव करायला दोन्ही कडे मदत लागणार हे नक्की आहे. त्यामुळे या नेत्याचे सोलापूरच्या राजकारणात अजूनही महत्त्व टिकून आहे.
