उत्तर सोलापूर (तालुका प्रतिनिधी) :- राष्ट्रवादी काँग्रेसचे जिल्हाध्यक्ष बळीरामकाका साठे यांच्या विरोधात मोहोळचे माजी नगराध्यक्ष रमेश बारसकरांनी केलेले वक्तव्य हे बालिशपणाचे असून काका साठे यांनी आयत्या पिठावर रेघोट्या मारल्या नाहीत. तर त्यांचे सारे आयुष्य संघर्षातच गेले आहे. तेव्हा पदाचा व पक्षाचा वापर अवैध धंद्यासाठी करणा-यांचे हे बोलणे बेताल असल्याची खरमरीत प्रतिक्रिया उत्तर सोलापूर तालुका राष्ट्रवादी काँग्रेसचे सरचिटणीस हरिभाऊ घाडगे यांनी पत्रकारांशी बोलताना दिली.
मोहोळचे माजी आमदार राजन पाटील व त्यांच्या परिवारावर पक्षातीलच माणसांकडून खालच्या पातळीवर जाऊन टीका होत असेल तर ती पक्षाचे जिल्ह्याचे प्रमुख या नात्याने पक्षश्रेष्ठींना सांगितले आणि चाललेले योग्य नाही, हे जाहीररित्या बोलल्यानंतर बारसकरांसारख्या जबाबदार पदाधिका-याला का झोंबावे, असा सवाल करुन घाडगे म्हणाले की, “काका साठे हे नेत्याच्या कानात बोलणारे नेते नाहीत. तर जे पोटात तेच ओठात, असे हजरजबाबी नेते आहेत.
काका साठे यांचा राजकीय, सामाजिक कार्याचा जेवढा अनुभव आहे, तेवढे बारसकरांचे वय नाही. तेव्हा त्यांनी काका साठें यांच्याबद्दल केलेले वक्तव्य म्हणजे जमिनीवर उभाराहून आभाळाला लाथा मारण्याचा हा प्रकार आहे. गेली 55 वर्षांपासून काका साठे हे देशाचे नेते खा.शरद पवार साहेबांवर नितांत निष्ठा ठेवून काम करीत आहेत. पक्षाचा वापर त्यांनी दोन नंबर धंद्यासाठी किंवा अधिका-यांच्या बदल्यांसाठी केलेला नाही, हे बारसकरांनी लक्षात घ्यावे. काकांच्या निष्ठेची नोंद पवार कुटुंबियांकडे आहे. आजवर काका साठे यांनी पदाचा वापर स्वतःचा स्वार्थ साधण्यासाठी, प्रपंचासाठी केला नाही.
सर्वसामान्य लोकांसाठी आणि कार्यकर्त्यांसाठीच त्यांनी सामाजिक, राजकीय जीवन वेचले आहे. गेल्या अडीच वर्षात राज्यात सत्ता असताना देखील त्यांनी स्वतःच्या लेटरहेडचा वापर कोणा अधिका-याच्या बदलीसाठी केलेला नाही,हेही बेताल वक्तव्य करणा-या बारसकरांनी ध्यानात घ्यावे. राष्ट्रवादी काँग्रेसच्या निर्मितीच्यावेळी काँग्रेसकडून आमदारपदाची आलेली संधी लाथाडून खा.पवार यांच्यापाठीशी उभे राहण्याचा पहिला निर्णय काका साठे यांनी घेतला आहे. जर बारसकरांना ही आफर कोणी दिली असती तर त्यांनी निष्ठा गहाण टाकली असती. पदाचा वापर अवैध धंद्यासाठी करुन पक्षाची प्रतिमा मलीन करणा-या बारसकरांनी काका साठेंच्या निष्ठेची उंची मोजू नये.“
उत्तर सोलापूर तालुक्यासह सोलापूर जिल्ह्यातील जाणकार जनतेला काका साठे यांचे काम माहीत आहे. सर्वसामान्यांच्या न्याय व हक्कासाठी झटणारे नेतृत्व म्हणजे काकांच नेतृत्व आहे.
या वयातही तरुणांना लाजवेल अस नेतृत्व आहे. पक्षाचा कार्यक्रम असला तर शेकडो हजारो कार्यकर्ते सोबत घेऊन काका साठे हजर असतात. फक्त स्टेजवर नेत्यांच्या कानात बोलताना फोटो काढणारे पुढेपुढे करणे त्यांना जमत नाही. तेव्हा अशा नेतृत्वाबद्दल यापुढे बोलताना विचार करावा,असा इशाराही घाडगे यांनी दिला.
