सोलापूर जिल्हा अग्रेसर ठेवा ; पालकमंत्र्यांनी बुके नाकारत 168 अनुकंप पदभरतीचे आदेश केले वाटप
सोलापूर पालकमंत्री जयकुमार गोरे यांच्या हस्ते गुरुवारी जिल्हा परिषदेमध्ये 168 अनुकंप धारकांना पदभरती नियुक्तीचे आदेश वाटप करण्यात आले. यावेळी आमदार राणा जगदीसिंह पाटील मुख्य कार्यकारी अधिकारी कुलदीप जंगम, पालकमंत्र्याचे विशेष कार्यकारी अधिकारी महादेव घुले, अतिरिक्त मुख्य कार्यकारी अधिकारी संदीप कोहिनकर, उप मुख्य कार्यकारी अधिकारी स्मिता पाटील, प्रकल्प संचालक अमोल जाधव, मुख्य वित्त वलेखा अधिकारी मीनाक्षी वाकडे, कार्यकारी अभियंता संजय धनशेट्टी, शिक्षणाधिकारी सचिन जगताप, कादर शेख, सुलभा वठारे, समाज कल्याण अधिकारी सुलोचना सोनवणे, महिला व बालकल्याण अधिकारी प्रसाद मिरकले, कृषी अधिकारी यांची उपस्थिती होती.
यावेळी प्राथमिक स्वरूपात 15 अनुकंपाधारकांना पदभरतीचे आदेश देण्यात आले. प्रारंभी सत्कार करताना जिल्हा परिषदेचा बुके पालकमंत्र्यांनी नाकारला परंतु मुख्यमंत्री समृद्ध ग्राम अभियानाचा लोगो असलेला बिल्ला त्यांनी आपल्या शर्टच्या खिशाला आवर्जून लावून घेत जिल्हा परिषदेने दिलेले पुस्तक मात्र आवडीने घेतले.
यावेळी बोलताना पालकमंत्री गोरे यांनी जिल्हा परिषदेच्या कामकाजाचे कौतुक करत मुख्यमंत्री देवेंद्र फडणवीस त्यांचे विशेष आभार व्यक्त केले. राज्यात सरकार आल्यानंतर शंभर दिवसाच्या कार्यक्रमात सर्वच शासकीय संस्थांचा अनुशेष भरून काढण्याचे आदेश दिले त्यामुळे सोलापूर जिल्हा परिषदेचा शंभर टक्के अनुशेष भरून निघाला आहे. जिल्ह्याचा पालकमंत्री आणि राज्याचा ग्रामविकास मंत्री असल्याने मुख्यमंत्री समृद्ध ग्राम अभियान यामध्ये सोलापूर जिल्हा परिषद अग्रेसर असावी अशी माझी अपेक्षा असून यासाठी आपण प्रयत्न करावा असे आवाहन केले.
