सोलापूर –महापालिकेच्या नूतन आयुक्त शितल तेली – उगले यांनी आज मंगळवारी स्मार्ट सिटी योजनेतून विकसित करण्यात आलेल्या इंदिरा गांधी पार्क स्टेडियम, होम मैदान महापालिकेच्या मागील बाजूला सुरू असलेले कमांड अँड कंट्रोल रूम त्याचबरोबर विष्णू मिल येतील एक्झिबिशन सेंटर आणि शहरात सुरू असलेले रोडचे प्रत्यक्ष पाहणी केली. व कामे चांगल्या पद्धतीने पूर्ण करण्याच्या संबंधित अधिकाऱ्यांना योग्य त्या सूचना देत मैदानावरील पाईप हटविण्यास त्यांनी सांगितले.
स्मार्ट सिटी डेव्हलपमेंट कार्पोरेशन अंतर्गत सोलापूर शहरातील मध्यवर्ती ठिकाणी असलेल्या इंदिरा गांधी पार्क स्टेडियमचे नूतनीकरणाचे करण्यात येत आहे. दरम्यान, मंगळवारी सकाळी साडेदहाच्या सुमारास महापालिका आयुक्त शितल तेली- उगले यांनी पार्क स्टेडियमचे स्पॉट इन्स्पेक्शन केले. यावेळी त्यांनी पार्क स्टेडियम मधील मैदान, क्रिकेटचे पीच , परिसरातील इतर सोयी सुविधा व स्वच्छतेची प्रत्यक्ष पाहणी केली.
यावेळी महापालिकेचे उपायुक्त मच्छिंद्र घोलप, नगर अभियंता संदीप कारंजे, क्रीडा अधिकारी मुर्तुज शहापुरे, माजी नगरसेवक नागेश वल्याळ आदींसह अधिकारी व असोसिएशनचे पदाधिकारी उपस्थित होते.
बाहेरील विद्युत डीपी परिसरात कचरा व अस्वच्छता दिसून आल्याने तातडीने या ठिकाणी नेटक्या पद्धतीने स्वच्छतेची कामे करून घेण्याचे आयुक्तांनी आदेश दिले. उर्वरित कामे चांगल्या पद्धतीने पूर्ण करण्याच्या आवश्यक त्या सूचनाही संबंधित अधिकाऱ्यांना त्यांनी दिल्या आहेत.
सोलापूर शहरातील मध्यवर्ती ठिकाणी असलेले हे मोठे स्टेडियम आहे. त्या कामाचे आज स्पॉट इन्स्पेक्शन केलेले आहे.अनेक कामे पूर्ण झाली आहेत. काही प्रगतीपथावर आहेत. आवश्यक त्या सूचना दिल्या आहेत. लवकरच हे स्टेडियम खेळाडू व नागरिकांच्या सेवेसाठी खुले होईल. मोठ्या स्पर्धा या ठिकाणी होतील असेही महापालिका आयुक्त शितल तेली – उगले यांनी यावेळी सांगितले.
