“तुम्ही मुसलमानांना त्रास देता” कुलकर्णींचा प्रहार
“मी मराठा म्हणून मला त्रास” शिक्षणाधिकारी ‘ताप’ले !
सोलापूर : माध्यमिक शिक्षण विभागात बुधवारी प्रचंड गोंधळ पाहायला मिळाला. प्रहार संघटनेच्या एका पदाधिकाऱ्याने माध्यमिक शिक्षणाधिकाऱ्यांना “तुम्ही मुसलमानांना त्रास देता” असा थेट प्रहार करत आरोप केला. त्या पदाधिकाऱ्याला ‘ताप’लेल्या शिक्षणाधिकाऱ्याने “मी मराठा म्हणून मला त्रास होतोय” यावेळी शेजारीच थांबलेला मागासवर्गीय कर्मचारी हे सर्व गोंधळ पाहत होता.
सोलापूर शहरातील काही अल्पसंख्यांक शैक्षणिक संस्थेमध्ये चेअरमन आणि संचालक पदाचा मोठा वाद आहे. हे वाद धर्मादाय आयुक्तांकडे सोडवले जातात. अशाच एका वादातील संस्थेच्या शिक्षक मान्यतेचा विषय घेऊन प्रहार संघटनेचे अजित कुलकर्णी (इतरवेळी जमीर भाई असे विषय घेऊन येत असतात) जिल्हा परिषदेमध्ये आपल्या काही कार्यकर्त्यांसोबत आले होते.
त्यांनी सुरुवातीला मुख्य कार्यकारी अधिकारी कुलदीप जंगम यांची भेट घेतली. जंगम यांनी शिक्षणाधिकारी सचिन जगताप यांना बोलावून घेतले. त्याचवेळी जिल्हा परिषदेच्या पोर्चमध्ये प्रहार चे कार्यकर्ते आणि शिक्षणाधिकारी जगताप यांची भेट झाली. जगताप यांना घेराव घातला. मान्यता का देत नाहीत? याचा जाब विचारण्यात आला परंतु शिक्षण संस्थे मधला चेअरमन, सचिव पदाचा गोंधळ असल्याचे सांगून प्रहारच्या कार्यकर्त्यांना समजावण्याचा प्रयत्न झाला.
कार्यकर्ते ऐकण्याच्या मनस्थितीत नव्हते, त्यांनी शिक्षणाधिकाऱ्यांना थेट त्यांच्या कार्यालयात घेऊन गेले. तिथेही बराच वेळ गोंधळ झाला. तुम्ही मान्यता का देत नाही असे म्हणून कुलकर्णी प्रहार करू लागले. शिक्षणाधिकारी जगताप समजावून सांगत होते. त्याचवेळी अजित कुलकर्णींच्या तोंडून “तुम्ही मुसलमानांना त्रास देता” असा थेट आरोप शिक्षणाधिकारी जगताप यांच्यावर झाला. याच वेळी तापलेल्या जगताप यांनीही “मी मराठा म्हणून मला तुम्ही लोक त्रास देताय” असा प्रति आरोप केला.
यावेळी कार्यालयात उपस्थित प्रहारचे कार्यकर्ते, मागासवर्गीय कर्मचारी, काही पत्रकार या दोघांचा जातीय शब्द ऐकून अवाक झाले.
कार्यालयात बराच वेळ गोंधळ सुरू होता परंतु या शिक्षण संस्थेचा वाद धर्मादाय आयुक्त कार्यालयात असल्याने शिक्षणाधिकारी जगताप यांनीही या प्रकरणात कोणतीही रिस्क घेतली नसल्याचे ऐकण्यात आले. शिक्षण उपसंचालकाकडे संबंधित फाईल दाखवून पुढे निर्णय घेणार असल्याचे समजले.
