सोलापूर शहरातील जिल्हाधिकारी कार्यालय परिसरात असलेल्या सिटी सर्व्हे ऑफिस अर्थातच नगर भूमापन अधिकारी यांच्या कार्यालयात आज सकाळी साडेदहा ते अकराच्या दरम्यान ग्रामीण पोलीस दलातील एका शिपायाने धुडगूस घातला, शासकीय कामात अडथळा आणत भूमापन निरीक्षकाला मारहाण केल्याची माहिती समोर येत आहे.
संबंधित पोलीस कर्मचारी बुधवारी सकाळी या कार्यालयात आपले काम घेऊन आला. एकाच प्लॉटची दोन विभागणीचे काम व्यवस्थित न झाले नसल्याची तक्रार करत येथील भूमापन निरीक्षक अशफाक भागानगरी यांच्यासोबत हुज्जत घातली, त्यांना शिवीगाळ करून मारहाण केल्याचे सांगितले जात आहे. तसेच याच कार्यालयात भागानगरी यांच्या समोर असलेल्या फाईल आणि कागदपत्रे भिरकावत अस्ताव्यस्त करून तेथे असलेली खुर्ची उचलून मारण्याचा प्रयत्न करत फेकून दिल्याने खुर्ची तुटल्याचे चित्र दिसत आहे.
याबाबत संबंधित कार्यालयाकडून अशफाक भागानगरी यांच्या मार्फत लवकरच पोलिसात सरकारी कामात अडथळा आणला व हल्ला प्रकरणात रितसर फिर्याद देऊन संबंधित ग्रामीण पोलीस दलातील त्या पोलीस कर्मचारी विरोधात कारवाई करण्यात येणार असल्याचे सांगण्यात आले. गुन्हा दाखल होऊ नये, हे प्रकरण मिटवामिटवी करण्याचे प्रयत्न संबंधित पोलिसांच्या मित्रांकडून करण्यात येत असल्याची माहिती मिळाली.
