हिंदवी स्वराज्याचे संस्थापक छत्रपती श्री शिवाजी महाराज आणि भोसले कुटुंबामुळे आजचा भारत अस्तित्वात आहे. त्यांचे हिंदुस्थानवरील उपकार न फिटणारे आहेत, असे प्रतिपादन हिंदवी स्वराज्याचे सरसेनापती हंबीरराव मोहिते यांचे १३ वे वंशज श्री जयाजीराव बाजी मोहिते (तळबीड) यांनी केले. खड्डा तालीम श्री शिवजन्मोत्सव मंडळातर्फे मंगळवारी सोलापूर शहर – जिल्ह्यासह राज्यातील शिवजयंती मंडळांना छत्रपती श्री शिवाजी महाराजांच्या सिंहासनाधिष्ठित मूर्तींचे वाटप करण्यात आले.
यावेळी व्यासपीठावर कार्यक्रमाचे अध्यक्ष माजी पालकमंत्री आ. विजयकुमार देशमुख, डॉ. शिवरत्न शेटे, ट्रस्टी अध्यक्ष पद्माकर काळे, मतीन बागवान, माऊली पवार, संजय कोळी, विनोद भोसले, रवि कैय्यावाले, श्रीकांत डांगे, राजकुमार पाटील, शंकर चौगुले, जयंत होले पाटील, भूपती कमटम, गजानन कलशेट्टी, बाबूराव जमादार, श्रीकांत जाधव, निलेशकुमार चव्हाण, बाळासाहेब पाटील, लखन झंपले, विलास गव्हाणे, नितीन पाटील, धनंजय पाटोळे, खड्डा तालीम मंडळाचे संस्थापक आणि कार्यक्रमाचे संयोजक सुनिल कामाठी, उत्सव अध्यक्ष जावेद पटेल, कार्याध्यक्ष राजू जमादार आदी उपस्थित होते.
प्रारंभी खड्डा तालीम येथील छत्रपती श्री शिवरायांच्या मूर्तीचे पूजन जयाजीराव मोहिते यांच्या हस्ते करण्यात आले. यानंतर मंडळांना मूर्तींचे वाटप झाले.
मोहिते म्हणाले, श्री शिवछत्रपतींचा इतिहास, कार्य अधिक व्यापकपणे पुढील पिढ्यांना कळावे याकरिता खड्डा तालीमचे प्रमुख सुनिल कामाठी यांनी मूर्ती देण्याचा उपक्रम अत्यंत कौतुकास्पद आहे. आयुष्यात येणाऱ्या संकटांच्या काळात सर्वांत मोठा आधार शिवचरित्राचाच मिळतो.
माजी पालकमंत्री आ. विजयकुमार देशमुख म्हणाले, छत्रपति श्री शिवाजी महाराजांचे विचार घरोघरी पोहचविण्यासाठी सुनिल कामाठी कार्यरत आहेत. शिव जयंती मोठ्या प्रमाणावर साजरी होण्यात अशा उपक्रमांचा वाटा मोठा आहे.
बळवंत जोशी यांनी सूत्रसंचालन तर राजकुमार माने यांनी आभार प्रदर्शन केले. शिवभक्तांची मोठी गर्दी मूर्तीवाटप कार्यक्रमास शहर जिल्ह्यासह राज्यातील अनेक मंडळांचे शिवभक्त मोठ्या संख्येने उपस्थित होते. हिंदवी स्वराज्याचे सरसेनापती हंबीरराव मोहिते यांचे १३ वे वंशज जयाजीराव मोहिते यांच्या समवेत छायाचित्र काढून घेण्यास तरुणांनी एकच गर्दी केली होती. दोन वर्षानंतर खुल्या वातावरणात श्री शिवजयंती साजरी होत आहे. त्यामुळे सर्वच शिवजयंती मंडळांमध्ये प्रचंड उत्साह दिसून येत आहे.
