महादेव कोगनुरे काँग्रेस पक्षात दाखल ; प्रदेशाध्यक्ष नाना पटोले यांनी दिला हा शब्द
सोलापूर : एम के फाउंडेशनचे संस्थापक अध्यक्ष महादेव कोगनुरे यांनी काँग्रेस प्रदेशाध्यक्ष नाना पटोले व काँग्रेस नेते सुशीलकुमार शिंदे यांच्या उपस्थितीत काँग्रेसचा झेंडा हाती घेतला. काँग्रेस भवन येथे हा प्रवेश कार्यक्रम मोठ्या उत्साहात संपन्न झाला.
सायंकाळी पाचच्या सुमारास कोगनुरे यांचे आपल्या शेकडो समर्थकांसह वाजतगाजत काँग्रेस भवनात दाखल झाले. यावेळी एम के फाउंडेशनच्या सर्व पदाधिकारी महादेव कोगणूरे यांचे समर्थक मोठ्या संख्येने उपस्थित होते.
त्यानंतर प्रवेश कार्यक्रम झाला, जिल्ह्याचे कार्याध्यक्ष नंदकुमार पवार यांनी काँग्रेसचा शेला महादेव कोगनुरे यांच्या गळ्यात घालून त्यांचे स्वागत केले. नाना पटोले यांनी बुके देऊन स्वागत केले.
प्रवेशानंतर महादेव कोगनुरे यांनी आपल्या भाषणात ज्येष्ठ नेते सुशीलकुमार शिंदे यांच्या शब्दाला मान देऊन काँग्रेस पक्षात प्रवेश केला असून कोणतीही अपेक्षा ठेऊन आलो नाही, पहिल्यांदा आमदार प्रणिती शिंदे यांना लोकसभा निवडणुकीत विजयी करण्यासाठी सर्व एकदिलाने काम करु असे आवाहन केले.
नाना पटोले यांनी कोगनुरे यांचे काँग्रेस पक्षात स्वागत केले, यंदाची लोकसभा निवडणूक काँग्रेससाठी प्रतिष्ठेची असल्याने सर्व कार्यकर्ते यांनी गाफील न राहता एकजूट होऊन काम करावे असे आवाहन करताना त्यांनी भविष्यात कोगनुरे यांची अपेक्षा पूर्ण करू असा शब्द दिला.
