सोलापूर : काँग्रेस पक्षात सध्या हात से हात जोडो अभियान जोरदार सुरू आहे. कोण कार्यक्रम चांगला घेणार यातूनही चढाओढ पहायला मिळते आहे. यातून आता वाद झाला असून सोमवारी काँग्रेसभवनमध्ये दोन ज्येष्ठ पदाधिकाऱ्यांमध्ये सोमवारी दुपारी चांगलीच हाणामारी झाली.
विशेष म्हणजे हा प्रकार शहराध्यक्ष चेतन नरोटे हे कार्यालयात असताना घडला. संपूर्ण दिवसभर काँग्रेस भवनसह कार्यकर्त्यांमध्ये हा चर्चेचा विषय ठरला.
सूत्रांकडून मिळालेल्या माहितीनुसार, काँग्रेस भवनमध्ये नेहमीप्रमाणे सोमवारी सकाळपासून कार्यकर्त्यांची रेलचेल सुरू होती. शहराध्यक्ष चेतन नरोटेही आपल्या केबीनमध्ये बसून कार्यकर्त्यांची हितगूज करत होते. त्याचवेळी हॉलमध्ये जुन्या प्रभाग 22 मधील काँग्रेसचे शहर उपाध्यक्ष आणि एका ब्लॉक अध्यक्षांमध्ये हात से हात जोडो या अभियानाच्या कार्यक्रमावरून हमरीतुमरी सुरू झाली आणि काहीकाळात त्याचे पर्यावसन हाणामारीत झाले.
यावेळी ब्लॉक अध्यक्षाने शहर उपाध्यक्षाला चांगलीच मारहाण केल्याचे सांगण्यात आले. हा प्रकार शहराध्यक्ष नरोटे यांना कळताच त्यांनी सोडवण्याचा प्रयत्न केला. मात्र तरीही दोघात हाणामारी सुरूच होती. शेवटी नरोटे यांनीच हे भांडण सोडवलेच. वाद मिटवून नंतर दोघांसोबत फोटोही काढले.
दुपारी झालेल्या या भांडणाची चर्चा सायंकाळपर्यंत काँग्रेस भवनमध्ये आणि कार्यकर्त्यांमध्ये सुरू होती. काँग्रेसभवनमधील कोणत्याही कर्मचाऱ्यांनी याची माहिती कोणाला दिली नाही. आम्ही बाहेर होतो, सुटीवर होतो, अशी उडवाउडवीची उत्तरे त्यांनी वरिष्ठांच्या सांगण्यावरून दिल्याची चर्चा होती.
