सोलापूर : जिल्ह्याचे नेते, करमाळा तालुक्याचे आमदार संजयमामा शिंदे (MLA Sanjaymama Shinde) हे सोमवारी जिल्हा परिषदेत होते. ते आले म्हटल्यावर अतिरिक्त मुख्य कार्यकारी अधिकारी संतोष धोत्रे, (Santosh Dhotre) उपमुख्य कार्यकारी अधिकारी चंचल पाटील, (Chanchal Patil) पाणी व स्वच्छता विभागाच्या स्मिता पाटील यांनी भेट घेतली. बराच वेळ बंद खोलीत या अधिकाऱ्यांची आमदार संजयमामा यांच्याशी चर्चा झाली. यावेळी सांगोल्याचे सभापती अनिल मोटे, सदस्य ऍड सचिन देशमुख, (Sachin Deshmukh) पंढरपूरचे सदस्य अतुल खरात यांची उपस्थिती होती. याचवेळी विरोधी पक्षनेते काका साठे (Kaka Sathe) यांच्या कार्यालयात बसलेले राष्ट्रवादी काँग्रेसच्या काही नेत्यांनी आमदार मामांची भेट घेतली.
पुढे सर्व सभागृहात गेले, तिथे जिल्हा परिषद पतसंस्था क्रमांक दोनच्या दिनदर्शिकेचा प्रकाशन कार्यक्रम होता.सभागृहात अध्यक्ष अनिरुद्ध कांबळे (Aniruddha Kamble) बसले होते, त्यांनी मोठ्या मनाने आपल्या तालुक्याच्या आमदाराला शेजारी बसण्यास विनंती केली, मामा येऊन बसले. सव्वा दोन वर्षानंतर संजयमामा सभागृहात त्या खुर्चीवर बसले. एका बाजूला सचिन देशमुख, व सांगोल्याचे नेते बाबा कारंडे होते.
सचिन देशमुख यांनी लगेच आमदार मामा आणि अध्यक्ष कांबळे यांना चिमटे काढले, काय राव आमदार करमाळ्याचा आणि अध्यक्ष सुद्धा करमाळ्याचा सगळीकडे तुमचीच हवा…,गप्प बसणारे मामा कसले, सचिन ही लोक मला करमाळ्याचा मानत नाहीत, माढ्याचाच म्हणतात.., असे म्हणतात अध्यक्ष कांबळे यांनी ‘माझं असं काय नसतंय ओ’ म्हणून आपली प्रामाणिक भूमिका स्पष्ट केली.
सोलापूर जिल्हा परिषद निवडणुकीसाठी आता राष्ट्रवादी काँग्रेसने जिल्ह्यात आमदार संजयमामा शिंदे यांच्या कडे जबाबदारी द्यावी अशी मागणीने जोर धरला आहे. जिल्ह्यात भाजपचे वर्चस्व वाढले असले तरी नेतृत्व नसल्याने भाजपची अडचण होण्याची शक्यता आहे. मात्र राष्ट्रवादी काँग्रेसची सुध्दा एवढी ताकद आता उरली नाही, म्हणून जिल्ह्यात जुळवून घेणाऱ्या नेत्यांमध्ये संजयमामा हे माहीर आहेत त्यांच्याकडे जबाबदारी दिल्यास चांगला रिझल्ट मिळेल अशी अपेक्षा राष्ट्रवादी काँग्रेसच्या कार्यकर्त्यांना आहे.
