सोलापूर : दिनांक 04 ऑक्टोबर रोजी दूध भेसळीच्या संदर्भात प्राप्त खात्रीशीर गुप्त माहितीवरून मु. पो- बोराळे ता- मंगळवेढा, जि- सोलापूर येथील धनाजी रामचंद्र गावकरे यांच्या मालकिच्या मे.बसवेश्वर दूध संकलन केंद्र या पेढीवर धाड टाकून तपासणी करण्यात आली. या तपासणी दरम्यान पेढीमध्ये व्हे पावडरचा 1 बॅग आढळून आले त्यानंतर या पेढी मालकाच्या घराची तपासणी केली असता त्याठिकाणी एका खोलीमध्ये व्हे पावडर (अपमिश्रक) अमूल ब्रॅण्ड चे 25 kg चे 4 बॅग आढळून आल्या. सदर व्हे पावडर बाबत हजर व्यक्तीकडे अधिक चौकशी केली असता त्यांनी सदर पावडर दुधात भेसळ करून फॅट/ SNF वाढविण्यासाठी वापरत असल्याचे सांगितले. यावरुन सदर पेढीमार्फत भेसळयुक्त दुधाची विक्री होत असल्याचे स्पष्ट झाले.
त्यानंतर तिथून गाय दुध या अन्न पदार्थाचे तसेच व्हे पावडर या अपमिश्रकाचे नमुने विश्लेषणास घेऊन उर्वरित 1.गाय दूध 796 ली. किंमत 22288 2.व्हे पावडर- (अपमिश्रक) 111 kg किंमत-11100 असे एकूण – 33388 चा साठा जप्त करून ताब्यात घेतला. जप्त करण्यात आलेले भेसळयुक्त गाय दूधाचा सुमारे 796 लिटरचा साठा नष्ट करण्यात आला. त्यानंतर सदर पेढीस तात्काळ व्यवसाय बंद करण्याचे आदेश देण्यात आलेले आहे.
सदरची कारवाई दिनांक 04 ऑक्टोबर रोजी रात्री उशिरापर्यंत सुरू होती.
सदरची कारवाई प्रदिपकुमार राऊत, सहाय्यक आयुक्त (अन्न ), सोलापूर यांच्या मार्गदर्शन खाली अन्न व औषध प्रशासनातील अन्न सुरक्षा अधिकारी, प्रशांत कुचेकर, उमेश भुसे यांच्या पथकाने पार पाडली.
