उत्तर सोलापूर पंचायत समितीचा गटविकास अधिकारी जस्मिन शेख यांची ग्रामविकास विभागाने तडकाफडकी बदली केली आहे त्यांना लांब वाशिम जिल्ह्यातील रिसोड पंचायत समितीच्या गटविकास अधिकारी पदी नियुक्ती देण्यात आली आहे.
जस्मिन शेख सप्टेंबर 2020 मध्ये उत्तर सोलापूर पंचायत समितीच्या गटविकास अधिकारी पदी रुजू झाल्या होत्या, उत्तर पंचायत समितीच्या सभापती रजनी भडकुंबे यांच्यासोबत कायमच त्यांचे वाद होत राहिले त्यांची सुमारे दहा ते अकरा महिन्यांची कारकीर्दही अतिशय वादग्रस्त राहिली आहे. सभापती सोबत प्रोटोकॉल न पाळणे, कर्मचाऱ्यांना घालून पाडून बोलणे, कामचुकारपणा करणे, घरी बसून काम करणे, कोविड काळात हलगर्जीपणा करणे अशा अनेक तक्रारी त्यांच्या विरोधात होत्या.
मुख्य कार्यकारी अधिकारी दिलीप स्वामी यांनी त्यांना बऱ्याच वेळा समज दिली होती मात्र त्यांच्या वर्तवणुकीत कोणतीही सुधारणा झाली नाही या प्रकरणात सभापती रजनी भडकुंबे या थेट मुख्यमंत्री, उपमुख्यमंत्री, ग्रामविकास मंत्री पर्यंत जस्मिन शेख यांची तक्रार केली होती. स्वामी यांनी त्यांना नोटीस देऊन खुलासा मागवला होता. सोमवार नऊ ऑगस्ट रोजी त्यांना पुन्हा एकदा स्वामी आणि परमेश्वर राऊत यांनी आपल्या केबिनमध्ये बोलावून समज दिली होती.
त्याच दिवशी ग्रामविकास विभागाने राज्यातील अनेक गटविकास अधिकाऱ्यांच्या बदल्या केल्या त्यामध्ये जस्मिन शेख यांना वाशीम जिल्ह्यात पाठवण्यात आले आहे. अशा हेकेखोर अधिकाऱ्यांपासून पंचायत समितीची सुटका झाल्याने कर्मचार्‍यांमध्ये आनंद व्यक्त झालाच मात्र सभापती रजनी भडकुंबे यांनी राज्य शासनाचे आभार मानले आहेत.
माजी आमदार दिलीप माने यांनीही या प्रकरणात लक्ष देऊन त्यांचा चार्ज काढून घेण्याची मागणी मुख्य कार्यकारी अधिकारी स्वामी यांच्याकडे केली होती. तसेच माने यांच्यासाठी हा विषय प्रतिष्ठेचा होता, बदली होताच उपमुख्यमंत्री अजित पवार यांच्या स्वीय सहाय्यकांकडून माने फोन गेल्याची माहिती आहे.
