सोलापूर : २१ सप्टेंबर २०२२ रोजी पहाटे सव्वातीनच्या सुमारास जुने बिडी घरकुल, सोलापुर येथील राज मेमोरीयल शाळेजवळ दशरथ नागनाथ नारायणकर या इसमाचा खुन झाल्याची माहिती पोलीस नियंत्रण कक्ष, सोलापुर शहर येथे मिळाली. पोलीस नियंत्रण कक्ष येथून सदरची माहिती एम.आय.डी.सी. पोलीस ठाणे गुन्हे शाखा कार्यालय तसेच वरिष्ठ अधिकारी यांना देण्यात आली.
पोलीस नियंत्रण कक्ष येथुन मिळालेल्या माहितीचे आधारे,उपायुक्त बापू बांगर, गुन्हे शाखा सहाय्यक आयुक्त डॉ. प्रिती टिपरे, वपोनि सुनिल दोरगे, सपोनि संजय क्षीरसागर, सपोनि महाडीक, सपोनि संदीप पाटील यांनी तसेच यांचे तपास पथकातील पोलीस अंमलदार यांनी तात्काळ घटनास्थळी भेट दिली. सदर घटनेबाबत एम. आय. डी. सी. पोलीस ठाणे येथे अज्ञात व्यक्तीविरुध्द भादवि कलम ३०२ अन्वये, वर नमुद मयताची पत्नी अरुणा दशरथ नारायणकर हिने फिर्याद दिलेवरुन गुन्हा दाखल झाला.
गुन्हे शाखेकडील वरील अधिकारी व पोलीस अंमलदार यांनी घटनास्थळी भेट दिल्यानंतर, घटनेची माहिती, पोलीस आयुक्त डॉ. राजेंद्र माने यांना देण्यात आली. तद्नंतर, पोलीस आयुक्त यांचे सुचनेनुसार बापू बांगर, उप-आयुक्त गुन्हे शाखा, डॉ. प्रिती टिपरे, सहा. पोलीस आयुक्त यांनी घटनास्थळाचे बारकाईने निरीक्षण करुन गुन्हे शाखेकडील वरील अधिकारी यांना खुनाचा गुन्हा उघडकीस आणणे बाबत मार्गदर्शन केले.
त्यानुसार गुन्हे शाखेकडील ०३ तपास पथके सदरचा गुन्हा उघडकीस आणणेसाठी प्रयत्न करीत होते. त्या दरम्यान, सपोनि संजय क्षीरसागर व त्यांचे तपास पथकातील पोलीस अंमलदार पोना महेश शिंदे, पोना कृष्णात कोळी, पोकॉ राजु मुदगल, पोकॉ कुमार शेळके, मपोना निलोफर तांबोळी यांनी, मयत इसम दशरथ नागनाथ नारायणकर व त्याची पत्नी अरुणा नारायणकर यांचेबाबत घटनास्थळावरुन तसेच त्यांचे मुळ गाव डोंबरजवळगा, ता. अक्कलकोट, जि. सोलापुर येथून, तेथील गोपनिय बातमीदारांकडुन माहिती प्राप्त केली. घटनास्थळी दिसुन आलेली परिस्थिती आणि गोपनिय बातमीदारांकडून मिळालेल्या बातमीचे आधारे, सपोनि संजय क्षीरसागर व त्यांचे तपास पथकातील पोलीस अंमलदार यांचा संशय मयताची पत्नी अरुणा नारायणकर हिचेकडे वळाला. त्याबाबत सपोनि संजय क्षीरसागर यांनी वरीष्ठ पोलीस अधिकारी यांना माहिती दिली. त्यानंतर, वरीष्ठ पोलीस अधिकारी यांचे मार्गदर्शनाखाली सपोनि क्षीरसागर यांनी, मयताची पत्नी अरुणा नारायणकर हिचे प्रेमसंबंध बाबासो जालींदर बाळशंकर याचेशी असल्याची माहिती मिळविली. मयत दशरथ नारायणकर हा त्याची पत्नी अरुणा व त्याची १२ वर्षाची मुलगी यांचेसह गेली ०३ महिण्यापासून जुना विडी घरकुल येथे राहत असल्याची तसेच या ३ महिण्याचे कालावधीत, बाबासो जालोदर बाळशंकर हा, अरुणा नारायणकर हिला वारंवार भेटल्याची माहिती सपोनि क्षीरसागर यांना मिळाली. तसेच घटनेच्या दिवशीही सकाळी, बाबासो बाळशंकर यास घटनास्थळाजवळ लोकांनी पाहोल्याची माहिती मिळाली.
त्यानंतर क्षीरसागर यांनी बाबासो जालींदर बाळशंकर याचे मोबाईल नंबर बाबत माहिती मिळविली. त्याचा मोबाईल बंद असल्याचे आढळुन आल्यानं त्याचेवर अधिकच संशय बळावला. त्यानंतर संशयीता बाबत अधिक माहिती घेतली असता, तो देखील डोंबरजवळगा, ता. अक्कलकोट, जि. सोलापुर येथे राहत असल्याचे समजले. तसेच घटना घडलेल्या रात्री तो त्याचे राहते घरी नव्हता आणि घटनेनंतर ३ ते ४ तासांनी तो गावी आल्याचे समजले. तसेच दिनांक २१/०९/२०२२ रोजी रात्री तो मुळे गाव क्रॉस रोड येथे येणार असल्याची माहिती मिळाली. त्यानुसार सपोनि क्षिरसागर यांनी दिनांक २१/०९/२०२२ रोजी २१.३० वाचे सुमारास, बाबासो जालींदर बाळशंकर यास मुळेगाव क्रॉसरोड येथून ताब्यात घेतले. त्यानंतर त्याचेकडे सखोल आणि कौशल्यपूर्वक तपास केला असता, बाबासो जालीदर बाळशंकर याने अरुणा नारायणकर हिचेशी गेली ७ ते ८ वर्षापासून प्रेमसंबंध असल्याचे कबुल केले. तसेच त्या प्रेमसंबंधातुन दशरथ नागनाथ नारायणकर याचा खुन मयताची पत्नी, अरुणा नाराणकर हिचेशी संगणमत व कट करुन केल्याची कबुली दिली.
त्या अनुषंगाने, सपोनि क्षिरसागर यांनी आरोपी बाबासो जालींदर बाळशंकर याचे मोबाईलची पाहणी केली असता, त्यामध्ये मयताची पत्नी, अरुणा नाराणकर हिने त्यास पाठविलेल्या व्हॉट्सअॅप चॅटची माहिती मिळाली. त्या चॅटवरुन, आरोपी बाबासो जालींदर बाळशंकर याने अरुणा नारायणकर हिचेशी संगणमत करून, कट रचून, खुनाची पुर्वतयारी साठी झोपेच्या गोळ्या, नायलॉन दोरी व चाकु खरेदी करुन, दशरथ नागनाथ नारायणकर याचा खुन केला असल्याचे निष्पन्न झाले.
त्यानंतर, अरुणा नारायणकर हिचेकडे गुन्ह्याचे अनुषंगाने तपास केला असता, तिने प्रथम उडवा उडवीची उत्तरे दिली. मात्र, बाबासो बाळशंकर याचे मोबाईल मधील चॅट विषयी माहिती दिली असता, तिने गुन्हा केल्याची कबुली दिली. त्यामुळे १) बाबासो जालींदर बाळशंकर वय २७ वर्षे, रा. डॉबर जवळगा, ता. अक्कलकोट, जि. सोलापुर व २) अरुणा दशरथ नाराणकर, वय-२९ वर्षे, रा. जुने विडी घरकुल, सोलापुर यांना गुन्ह्यात अटक करण्यात आली आहे. गुन्ह्याचा पुढील तपास एम.आय.डी.सी. पोलीस ठाणे करीत आहे.
