सोलापूर : सोलापूर शहरातील वस्त्रोद्योग, हातमाग, गारमेंट व लघु उद्योगाला चालना देण्यासाठी व तेलुगू भाषिक बांधवांमधून नवउद्योजक घडविण्यासाठी शासनाने श्री महर्षी मार्कंडेय महामुनी आर्थिक विकास महामंडळाची स्थापना त्वरित करावी अशी मागणी शिवसेना जिल्हाप्रमुख पुरुषोत्तम बरडे यांनी केली.
>
शिवसेना प्रणित शिव वस्त्रोद्योग महासंघाची स्थापना करुन प्रेसिडेंट प्रा. अजय दासरी यांच्या नेतृत्वाखाली नवी कार्यकारिणी जाहीर करण्यात आली. या नव्या कार्यकारणीतील पदाधिकारी व सदस्यांना मानाचा भगवा फेटा बांधून व गळ्यात शिवसेनेचे उपरणे घालून शिवसेना जिल्हाप्रमुख पुरुषोत्तम बरडे व शहरप्रमुख गुरुशांत धुत्तरगांवकर यांच्या हस्ते नियुक्ती पत्र प्रदान करण्यात आले, त्याप्रसंगी बरडे बोलत होते.
ते पुढे म्हणाले की, शिवसेना प्रणित संघटनेत कार्य करित असलेल्या प्रत्येक उद्योजकाच्या समस्या यापुढे आमच्या समस्या मानून खंबीरपणे आम्ही सोबत उभे राहू. सध्या राज्यात ‘आपले सरकार’ असून या ठाकरे सरकारच्या माध्यमातून सोलापूर शहराच्या पूर्व विभागाला गतवैभव प्राप्त करुन देण्यासाठी कटिबध्द राहू. लवकरच मुख्यमंत्री मा. उध्दव ठाकरे यांच्यासह उद्योग मंत्री सुभाष देसाई, नगरविकासमंत्री एकनाथ शिंदे यांच्या समवेत महासंघाच्या पदाधिकाऱ्यांची बैठक लावण्यासाठी वेळ घेणार असल्याचेही पुरुषोत्तम बरडे यांनी सांगितले.
शिव वस्त्रोद्योग महासंघाच्या कार्यकारीणीला शुभेच्छा देताना शहरप्रमुख गुरुशांत धुत्तरगांवकर म्हणाले की, आपल्या सर्वांची जबाबदारी आता वाढली आहे. शासन दरबारी समस्या मांडत असतानाच, शासनाच्या योजनांचा लाभ शेवटच्या घटकापर्यंत पोहचवून शहराचा विकास साधण्यात योगदान देणे अपेक्षित आहे.
प्रेसिडेंट प्रा. अजय दासरी यांनी उद्योजकांच्या व्यथा मांडल्या व अक्कलकोट रोड एमआयडीसी मिश्र झोन जाहीर होण्याची, येथील अंतर्गत रस्ते, मुबलक पाणी व ड्रेनेज व्यवस्था आदी मूलभूत सुविधांसाठी भरीव निधीची गरज असल्याचे सांगतानाच सोलापूरला ‘टेक्सटाईल सिटी’ जाहीर करुन सुविधा पुरविल्यास उद्योजकांचे स्थलांतरण होणे थांबेल व त्याकरिता हा महासंघ पूर्ण जोमाने कार्यरत राहील अशी ग्वाही दिली. कार्यक्रमाचं प्रास्ताविक अध्यक्ष भालचंद्र बोम्मेन यांनी मांडलं.
शिवसेना प्रणित शिव वस्त्रोद्योग महासंघाची आज जाहीर झालेली कार्यकारिणी अशी – प्रेसिडेंट – प्रा. अजय दासरी, अध्यक्ष – भालचंद्र बोम्मेन, उपाध्यक्ष – हरी पासकंटी, विठ्ठल कनकट्टी व बालाजी बोल्ली, सरचिटणीस – अनिल दासरी, सहचिटणीस – जयप्रकाश मुदगुंडी व शिवा बिज्जरगी, कोषाध्यक्ष – डॉ. वेंकटेश सादुल, कार्यालय प्रमुख – राजेश वडीशेरला, कार्यकारिणी सदस्य – मदनमोहन बुर्गल, जगदीश कलकेरी, दत्तात्रय कोंडा, राजमहेंद्र येमुल, किशोर मादास, मुरली गंजी, जालंदर चन्ना, गिरीष रंगदळ, गौतम जक्कन, सतीश नंदाल, नीतीन आदोने
या कार्यक्रम प्रसंगी माजी नगरसेवक सर्वेशम येमुल, गिरीष सरवदे, वैशाली कुलकर्णी, सारिका साठे आदींचीही उपस्थिती होती.
