सोलापूर | 2014 ची विधानसभा निवडणूक, 2017 ची महानगरपालिका निवडणूक व 2019 ची विधानसभा निवडणूक पाहिली तर सोलापूर शहरांमध्ये मुस्लिम समाज काँग्रेसपासून बराचसा दूर गेल्याचं दिसून येतं. याला कारण म्हणजे एमआयएम हा पक्ष आहे. केवळ अपवाद हा प्रभाग क्रमांक 14 मधील पोटनिवडणुकीचा आहे. या ठिकाणी पोटनिवडणुकीत काँग्रेस विरुद्ध एमआयएम अशी लढत झाली मात्र काँग्रेसमधील सर्व नेत्यांनी एकीच्या जोरावर एमआयएमला धूळ चारली होती.
कॉंग्रेस पक्षातील बरेच जण एमआयएम मध्ये गेले, त्याचा मोठा फटका बसला आणि महापालिकेतील सत्ता गेली. मात्र आता एमआयएमचे नेते नगरसेवक तौफिक शेख हेसुद्धा राष्ट्रवादीचा मार्गावर आहेत. एमआयएम शहराध्यक्ष फारूक शाब्दी यांनी आता संपुर्ण एमआयएम पक्ष ताब्यात घेतला आहे, महापालिकेच्या निवडणूकीसाठी जोरदार मोर्चेबांधणी सुरू आहे, पक्षाला यंदा काहीही करून साम-दाम वापरून रिझल्ट द्यायचा अशी जोरदार तयारी फारूक शाब्दी यांनी केली आहे.
दुसरीकडे राष्ट्रवादी काँग्रेसकडे जरी मुस्लिम समाजाचा कार्यकर्ता वर्ग मोठा असला तरी तोफिक शेख यांच्या माध्यमातून ताकद वाढवण्याचे नियोजन केले आहे, काँग्रेस पक्षाकडे ही मुस्लिम समाजातील नेत्यांची मोठी गर्दी आहे मात्र हे नेते पक्षाला मतदान मिळवून देण्यात कमी पडतात, काँग्रेस पक्षाचा अल्पसंख्यांक विभाग म्हणावा तितका सक्रिय दिसून येत नाही. नगरसेवकपद व अल्पसंख्यांक शहराध्यक्षपद हे एकाच व्यक्तीकडे असल्याने त्यांना काम करताना अडचणी येतात, याचा विचार करून काँग्रेस श्रेष्ठींनी सोलापुरात अल्पसंख्यांक अध्यक्ष बदलण्याचे ठरवल्याची माहिती कार्यकर्त्याकडून मिळाली.
अल्पसंख्यांक शहर अध्यक्ष पदासाठी अनेक कार्यकर्ते इच्छुक आहेत, यामध्ये विजापूर वेस, बाराईमाम चौक ,किडवाई चौक परिसरात मुस्लिम समाजात चांगली ओळख आणि प्रतिमा असलेल्या जुबेर कुरेशी अर्थात ‘झेड बॉस’ यांच्या गळ्यात हे पद पडेल अशी दाट शक्यता वर्तवली जात आहे. त्यांनी 2019 च्या विधानसभा निवडणुकीत अतिशय झोकून देऊन काम केले होते, आमदार प्रणिती शिंदे यांच्या अत्यंत निष्ठावंत कार्यकर्त्यांमध्ये कुरेशी यांचा समावेश असल्याचं बोललं जातंय.
अल्पसंख्यांक शहराध्यक्ष पदासाठी इच्छुकांमध्ये जुबेर कुरेशी यांचे नाव आघाडीवर आहे, आगामी महापालिका निवडणुकीच्या तोंडावर जुबेर कुरेशी यांना पक्ष गिफ्ट देण्याची शक्यता असून काँग्रेसने पैलवान-शाब्दी यांच्याविरोधात आता आपला ‘झेड बॉस’ मैदानात उतरवण्याचे ठरवल्याने आगामी निवडणुकांमध्ये चांगलीच रंगत पाहायला मिळणार आहे. मुस्लिम समाजात जाऊन त्यांचे प्रश्न, समस्या समजून घेऊन विशेष करुन युवक वर्गांना पुन्हा काँग्रेसकडे वळविण्याची मोठी जबाबदारी कुरेशी यांना पार पाडावी लागणार आहे.
