सोलापूर : सोलापूर लोकसभेची जागा राष्ट्रवादी काँग्रेसने मागितल्यानंतर पूर्वाश्रमीचे काँग्रेस नेते सध्या राष्ट्रवादी काँग्रेसमध्ये असणारे सुधीर खरटमल यांची चांगलीच चर्चा झाली. हा विषय लांब पर्यंत गेल्याचे बोलले जात आहे. परंतु खरटमल हे उमेदवार आणि ही जागा राष्ट्रवादी घेणार म्हणल्यावर काँग्रेसला हे पचनी पडले नाही. त्याचे वेगळेच पडसाद सोलापुरात उमटले होते.
शुक्रवारी महामानव डॉक्टर बाबासाहेब आंबेडकर यांच्या जयंतीनिमित्त त्यांच्या पूर्णकृती पुतळ्यास अभिवादन करण्यासाठी गर्दी झाली होती. यावेळी सुधीर खरटमल हे सुद्धा अभिवादनाला आले परंतु राष्ट्रवादी काँग्रेसचे कार्यकर्ते यायला उशीर झाल्याने तेवढ्यात काँग्रेसचे माजी महापौर आरिफ शेख, माजी नगरसेवक शिवा बाटलीवाला, माजी प्रवक्ते हाजीमलंग नदाफ, माजी मागासवर्गीय अध्यक्ष एन के क्षीरसागर यांच्यासोबत खरटमल यांनी बराच वेळ गप्पा मारल्या. पत्रकारांचे कॅमेरे त्यांच्यावर टिपून होते. याचवेळी नदाफ यांनी ही आमची महाविकास आघाडी आहे भविष्यात ही जागा राष्ट्रवादीला गेली आणि खरटमल हे उमेदवार असतील तर आम्हाला निश्चित त्यांचा प्रचार करावा लागणार असे सांगून विषयाला तोंड फोडले.
आरिफ शेख, बाटलीवाला मात्र यावेळी सावध दिसून आले. तेवढ्यात काँग्रेस शहराध्यक्ष चेतन नरोटे आले त्यांनीही खरटमल यांच्या हातात हात देऊन सोबत फोटो काढला. आतून नाराजी बाहेरून मात्र न दाखवणारे माजी महापौर संजय हेमगड्डी ही आले त्यांनाही या ग्रुपने फोटोमध्ये घेतले. यानंतर राष्ट्रवादी आणि काँग्रेसच्या सर्व कार्यकर्त्यांनी एकत्र येऊन सामूहिक अभिवादन केले. आणि यावेळी “संविधान बचाव, देश बचाव” अशी जोरदार घोषणाबाजी सर्व कार्यकर्त्यांनी डॉक्टर बाबासाहेब आंबेडकर पुतळ्यासमोर केली. यानंतर चौकामध्ये सेल्फी पॉईंटच्या आयोजन करण्यात आले होते. त्या ठिकाणी शहराध्यक्ष नरोटे व सुधीर खरटमल या दोघांनीही एकत्रित सेल्फी काढत कार्यकर्त्यांच्या आनंद द्विगुणित केला.
