सोलापूर राष्ट्रवादी काँग्रेसचे जिल्हाध्यक्ष बळीराम काका साठे व जिल्हा कार्यकारी अध्यक्ष उमेश पाटील यांच्या सध्या शीतयुद्ध सुरू आहे. दक्षिण सोलापूर तालुक्यातील राष्ट्रवादी काँग्रेसचे तालुकाध्यक्ष बदलावरून सध्या हे रान पेटले आहे, नागरीकांचा जनता दरबार हा उमेश पाटील यांच्या संकल्पनेतून पुढे आलेल्या कार्यक्रमाचे उद्घाटन अक्कलकोट तालुक्यात विशेष म्हणजे जिल्हाध्यक्ष काका साठे यांच्या हस्ते जोरदार झाले,
मात्र या कार्यक्रमा दरम्यानच दक्षिण सोलापूर तालुक्याचे तालुकाध्यक्ष सुभाष पाटील यांना तडकाफडकी बदलण्यात येऊन त्यांच्या जागेवर बिपिन करजोळे यांची निवड झाली. या नियुक्तीला उमेश पाटलांनी विरोध केला आहे त्यांनी त्यांच्या अधिकारात तालुका अध्यक्ष निवडीला स्थगिती दिली आहे, परंतू राष्ट्रवादी काँग्रेस पक्षाच्या घटनेमध्ये कार्यकारी अध्यक्ष हे पद नाही त्यामुळे उमेश पाटलांना कोणतेही अधिकार नाहीत जिल्हाध्यक्ष करतील तिच नियुक्ती कायम राहणार असल्याचं काका साठे यांनी ठणकावून सांगितले होते.
या प्रकरणानंतर सध्या उमेश पाटील हे मुंबईमध्ये आहेत दरम्यान सोमवारी काका साठे उपमुख्य कार्यकारी अधिकारी चंचल पाटील यांचा कार्यालयात बसले होते तेव्हा काही पत्रकारांनी या प्रकरणात त्यांना छेडले असता त्यांनी सुभाष पाटील यांच्याबाबत नेमकी तक्रार काय होती त्याचे स्पष्टीकरण दिले मग अशा माणसाला तालुका अध्यक्ष पदावर ठेवायचे का? पक्षाला हे शोभते का? म्हणून त्याच्या जागेवर दुसरा पदाधिकारी निवडला असे सांगितले.
दरम्यान उमेश पाटील हे भविष्यात जिल्ह्याला डोकेदुखी ठरतील अशी थेट नाराजी काका साठे यांनी पत्रकारांसमोर व्यक्त केली. उमेश पाटील कोणाला विश्वासात घेत नाहीत जरी विश्वासात नाही घेतलं तरी विनाकारण कोणाला डीवचू नये, आज पर्यंत मी शांत होतो, परंतु आता गप्प बसणार नाही, माझे अधिकार काय आहेत ते मला माहिती असून त्याचा आता यापुढे वापर करणार असल्याची भूमिका काका यांनी पत्रकारांसमोर मांडली. यावरून पक्षांतर्गत एकमेकांबाबत नाराजी ,गटबाजी आणि अंतर्गत धुसफूस किती आहे याचा अंदाज आला.
