सोलापूर – उत्तर सेालापूर तालुक्यातील रानमसले येथील विना परवाना दगड खाणी आणि खडी क्रशरवर उत्तर तहसील आणि गौण खनिज विभागाने कारवाई केली असून रानमसले परिसरातील जवळपास 6 दगड खाणी आणि क्रशर सील करण्यात आले आहेत. रामनसले येथे विना परवाना खाणी आणि क्रशर सुरु असल्यामुळे आजुबाजूच्या शेतकर्‍यांच्या शेती पीकांचे मोठ्या प्रमाणावर नुकसान होत असल्याची तक्रार स्थानिकांनी केली होती. त्या अनुषंगाने गौण खनिज विभागाच्या खणीकर्म अधिकारी दिव्या वर्मा आणि उत्तर तहसिलदार जयंत पाटील यांनी ही कारवाई केली आहे.
उत्तर सेालाापूर तालुक्यातील रानमसले परिसरातील अवैध आणि विना परवानगी खडी क्रशर आणि दगड खाणीमध्ये उत्खन होत आहे.त्यामुळे स्थानिक नागरिक आणि आजूबाजूच्या शेतकर्‍यांना त्याचा त्रास होत आहे.तसेच त्यामधून निर्माण होणार्‍या धुराळा आणि फुफाट्यामुळे आजूूबाजूची शेती नापिक बनली असून पीकांची वाढ खुंटत असल्याच्या तक्रारी स्थानिकांनी केल्या होत्या.त्यावर गौण खनिज अधिकारी दिव्या वर्मा आणि उत्तर तहसीलदार जयंत पाटील यांनी प्रत्यक्ष जावून पाहणी केली आहे.तसेच दगड खाणीला आणि विद्युत पुरवठा होत असलेल्या डिपीला सील ठोकण्यात आले आहे.त्यामुळे उत्तर सेालापूर तालुक्यातील खडी क्रशर वाल्यांचे आता धाबे दणाणले आहेत.तसेच जर पुन्हा सील तोडून कोणी क्रशर अथवा खाण सुरु करण्याचा प्रयत्न केल्यास तातडीने वरिष्ठ कार्यालयाला कळविण्याच्या सूचना तहसीलदार जयंत पाटील यांनी तलाटी आणि मंडळ अधिकार्‍यांना केल्या आहेत.
………………………….
