सोलापूर- दक्षिण सोलापूर तालुक्यातील इंगळगी ग्रामपंचायतीच्या चालू अवस्थेतील चार इमारती, एक ब्रिटिशकालीन विहीर, मरीआई देवी मंदिर आणि 14 गुंठे वहीवटीच्या जागेची परस्पर विक्री झाल्याचा धक्कादायक प्रकार उघडकीस आला आहे. त्यामुळे ग्रामपंचायतीचे सरपंच व सर्व सदस्यांनी जिल्हाधिकारी व तहसीलदारांकडे धाव घेऊन निवेदनाद्वारे घडला प्रकार थांबवण्याची व संबंधितांवर कारवाई करण्याची मागणी केली आहे.
याबाबत अधिक माहिती अशी की, स्वातंत्र्य पूर्व काळात इंगळगीचे देशमुख हे इंगळगीसह आजूबाजूच्या 33 गावचे जहागीरदार होते. त्याकाळी व देशाला स्वातंत्र्य मिळाल्यानंतरही अनेक वर्षे इंगळगी गावचे कारभारी देशमुख हेच होते. त्यामुळे गावातील देशमुख यांच्या 14 गुंठे जागेत इंगळगीची ग्रामपंचायत कार्यालय, जुनी शाळा, विहीर, मरीआई देवी मंदिर बांधण्यात आले. देशाला स्वातंत्र्य मिळाल्यापासून इंगळगी ग्रामपंचायतीचे इथे इमारत आहे. तिथेच कार्यालयीन कामकाज चालते. सुरुवातीला शाळा येथे भरत होती. आता तिथे सोलापूर दक्षिण विधानसभा मतदारसंघाची 131 क्रमांकाची बूथ खोली आहे. गावाला पाणीपुरवठा करणारी ब्रिटिशकालीन विहीर देखील इथेच आहे. या सर्व बाबी ग्रामपंचायतीच्या उताऱ्याला नोंद आहेत. चौदाव्या वित्त आयोगातून मोठा निधी येथे खर्च करण्यात आलेला आहे.
असे असताना देशमुख यांच्या आताच्या पिढीने ही जागा परस्पर दुसऱ्याला विक्री केलेली आहे. वास्तविक नियमानुसार 14 गुंठे शेत जमिनीची खरेदी-विक्री होत नाही. तरीदेखील बेकायदेशीररित्या खरेदी विक्रीचा व्यवहार झालेला आहे.आता या जागेत त्यांनी अनधिकृत पद्धतीने तार कंपाउंड बांधले आहे. या संदर्भात ग्रामपंचायत कार्यालयाकडून ग्रामसभा व मासिक सभा घेऊन ठराव करून वरिष्ठ कार्यालयाला कळविले आहे. ग्रामपंचायतचे सरपंच लक्ष्मी वळसंगे, उपसरपंच गोदावरी गुरव, सदस्य बशीर शेख, अमर पाटील, सिद्धेश्वर घोडके, विनोद बनसोडे, कांताबाई माने, पार्वती वंजारे, मंगल हरणे आदींनी जिल्हाधिकारी, जिल्हा परिषदेचे मुख्य कार्यकारी अधिकारी, तहसीलदार, गटविकास अधिकारी, जिल्हा मुद्राण अधिकारी आणि पोलीस अधीक्षक यांना निवेदन सादर करून इंगळगी ग्रामपंचायतीवर झालेला अन्याय दूर करून घडलेला बेकायदा प्रकार थांबवण्याची मागणी केली आहे.
