सोलापुरात भाजपने अजितदादांची राष्ट्रवादी फोडली? ; किसन जाधव, नागेश गायकवाड जाणार भाजपमध्ये
सोलापूर : महापालिकेच्या तोंडावर भारतीय जनता पार्टीने सोलापुरात अजित पवार यांना मोठा धक्का देण्याच्या तयारीत असून माजी गटनेते किसन जाधव माजी नगरसेवक नागेश गायकवाड यांना भाजपात घेण्याच्या हालचाली सुरू आहेत.
पालकमंत्री जयकुमार गोरे, आमदार देवेंद्र कोठे यांच्या प्रमुख उपस्थितीत हॉटेल बालाजी सरोवर या ठिकाणी जाधव गायकवाड यांच्याशी बंद दाराआड बराच वेळ रात्री उशिरा पर्यंत चर्चा सुरू होती पण प्रवेशासाठी शहराच्या अध्यक्षा उपस्थित राहणे गरजेचे असल्याने हा प्रवेश गुरुवारी संपन्न होणार आहे.
सोलापुरात अजित पवारांचे अतिशय कट्टर समर्थक म्हणून किसन जाधव यांची ओळख होती. 2017 च्या निवडणुकीत राष्ट्रवादी काँग्रेसचे तीन नगरसेवक निवडून आले होते.
त्यामध्ये किसन जाधव, नागेश गायकवाड आणि सुनिता रोटे यांचा समावेश होता.
राज्याचे उपमुख्यमंत्री तथा अर्थमंत्री अजित पवार यांच्याकडून कोट्यावधीचा निधी किसन जाधव नागेश गायकवाड यांनी आणला होता. आता तर विधानसभेचे उपाध्यक्ष अण्णा बनसोडे यांच्यामार्फत सुद्धा किसन जाधव यांनी मोठ्या प्रमाणात निधी मंजूर करून घेतला होता. विकास निधी देताना कायम झुकते माप देणारे अजित पवार आता किसन जाधव यांच्या भाजप प्रवेशा नंतर काय भूमिका घेतात हे सुद्धा पाहणे महत्त्वाचे ठरणार आहे.
ऐन महापालिकेच्या तोंडावर किसन जाधव हे भाजपात जात असल्याने राष्ट्रवादीला मोठा धक्का मानला जात आहे. एकीकडे एकनाथ शिंदे यांची शिवसेना युतीसाठी सरसावली असताना दुसरीकडे भारतीय जनता पार्टीची भूमिका युतीसाठी सकारात्मक दिसत नाही. त्यामुळे राष्ट्रवादी काँग्रेसच्या वतीने स्वबळाची भूमिका घेत आपकी बार 75 पार नारा देण्यात आला आहे. देवेंद्र कोठे हे शहर मध्य चे आमदार झाल्यानंतर किसन जाधव कायमच त्यांच्या संपर्कात राहिले आहेत प्रत्येक कार्यक्रमाला देवेंद्र कोठे यांना मान सन्मानाने बोलावले जात असल्याचे दिसून आले.
