सोलापूर जिल्हा परिषदेच्या जलजीवन मिशनचा गोंधळ संपत नाही तोच आता नव्याने एक प्रकार समोर आला आहे. सोलापूर महानगरपालिकेने काळ्या यादीत टाकलेल्या सोनी कंस्ट्रक्शनला जलजीवनचे २२ कोटीचे काम देण्यात आल्याची तक्रार पुढे आली आहे.
जलजीवन मिशन अंतर्गत जिल्हयातील गावातील पाणी पुरवठा योजनेच्या कामाची कामे मार्गी लावण्याठी झेडपी पाणी पुरवठा विभागाने निविदा प्रक्रिया उरकली आहे. यात मनपाकडे पाणी पुरवठ्याचे काम करणारे ठेकेदार श्रीकांत सोनी यांना २२ कोटीची कामे मंजूर करण्यात आली आहे. विशेष म्हणजे सोनी यांना मनपाने काळ्या यादीत टाकले आहे. याबाबत मनपाचे प्रशासक तथा आयुक्त शीतल तेली यांनी २४ जानेवारी 2023 रोजी केलेला ठराव तक्रारीसोबत जोडला आहे.
मनपाने सोनी यांना भारतनगर, तक्षशीलनगर, पंचशीलनगर ते कुमठानाका परिसरातील पाणी पुरवठा सुधारण्यासाठी मेडीकल वस्तीगृह ते गुरूनानक चौकापर्यंत मुख्य जलवाहिनी घालण्याचे काम दिले होते. हे काम लोकशाहिर अण्णाभाऊ साठे नागरी सुधारणा योजनेतून मंजूर असल्याने वेळेत पूर्ण करणे अपेक्षीत होते. पण सोनी यांनी हे काम वेळेत पूर्ण न केल्याने बयाणा व सुरक्षीत रक्कम जप्त करण्यात येऊन त्यांना काळ्या यादीत घालण्याचा निर्णय घेण्यात आला. मनपाने कारवाई केलेली असताना ही बाब दडवून सोनी यांनी झेडपीत मोठे कंत्राट मिळविल्याचे लोकशासन आंदोलन पार्टीचे जिल्हाध्यक्ष राजू दिंडोरे, कार्याध्यक्ष मारुती जाधव यांनी निदर्शनाला आणले आहे. मुख्य कार्यकारी अधिकारी दिलीप स्वामी यांनी कार्यकारी अभियंता कटकधोंड यांना याबाबत चौकशी करण्याचे आदेश दिले आहेत.
याप्रकरणी राजू दिंडोरे व मारुती जाधव म्हणाले, टेंडर देताना संबंधित कॉन्ट्रॅक्टर कडून बॉण्डवर प्रतिज्ञापत्र लिहून घेतले जाते. त्यानुसार जिल्हा परिषदेने आता मक्तेदार सोनी यांची चौकशी करावी जर महापालिकेने काळया यादी टाकले असताना अशा मक्तेदाराला जिल्हा परिषदेने टेंडर कसे दिले? असे अनेक प्रश्न आहेत त्याची सखोल चौकशी व्हावी अशी मागणी केली.
जलजीवनचे काम घेणारे ठेकेदार सोनी यांना मनपाने काळ्या यादीत टाकले आहे. याशिवाय सोनी यांनी मंद्रुप पाणी पुरवठा योजनेचे काम घेतले आहे. मुदत संपून जमाना झाला तरी योजनेचे काम बरेच अर्धवट आहे. याबाबत सरपंच अनिता कोरे, ग्रामसेवक नागेश जोडमोटे यांनी पाठपुरावा करूनही सोनी यांनी दाद दिली नसल्याच्या तक्रारी आहेत.
