सोलापूर : मराठा सेवा संघ जिल्हा परिषद शाखेच्या वतीने रमजान सणानिमित्त जिल्हा परिषदेतील अधिकारी कर्मचाऱ्यांसाठी रोजा इफ्तार पार्टीचे आयोजन करण्यात आले होते. शिवरत्न सभागृहात आयोजित या कार्यक्रमाला अतिरिक्त मुख्य कार्यकारी अधिकारी संदीप कोहिनकर मुख्य वित्त व लेखा अधिकारी अजयसिंह पवार मुख्य कार्यकारी अधिकारी इशाधीन शेळकंदे, माध्यमिक शिक्षणाधिकारी जावेद शेख, लेखाधिकारी कैलास कुंभार, वैभव राऊत, मराठा सेवा संघाचे उत्तमराव माने, रफिक मुल्ला, रफिक शेख, अध्यक्ष अविनाश गोडसे, लोकशासनचे राजू दिंडोरे, मारुती जाधव यांच्यासह जिल्हा परिषदेचे विविध विभागातील कर्मचारी निवृत्त अधिकारी कर्मचारी मोठ्या संख्येने उपस्थित होते.
सोलापूर जिल्हा परिषदेमध्ये प्रथमच अशी रोजा इफ्तार पार्टी आयोजित करण्यात आली. त्याबद्दल मुस्लिम समाजातील अधिकारी-कर्मचाऱ्यांनी अतिशय आनंद व्यक्त केला. हीच प्रथा दरवर्षी सुरू राहावी अशी अपेक्षा व्यक्त करताना त्यांनी मराठा सेवा संघाचे जिल्हा परिषद अध्यक्ष अविनाश गोडसे यांच्या उपक्रमाचे कौतुक केले.
अतिरिक्त मुख्य कार्यकारी अधिकारी कोहिनकर, माध्यमिक शिक्षणाधिकारी जावेद शेख, कॅफो अजयसिंह पवार यांनी एकमेकांना खजूर भरवून रोजा इफ्तार पार्टीचा आनंद साजरा केला. लेखाधिकारी वैभव राऊत यांनी रोजा केल्याने अजयसिंह पवार यांनी त्यांना खजूर भरवला. मुस्लिम बांधव व हिंदू बांधवांनी एकमेकांना गळा भेट देऊन जातीय सलोख्याचे दर्शन घडवले. कोहिणकर, शेख, पवार यांनी या रमजान सणाच्या शुभेच्छा देत उपक्रमाचे कौतुक केले, अशा कार्यक्रमाने जिल्हा परिषदेमध्ये जातीय सलोखा व सामाजिक बांधिलकी निश्चित कायम राहील अशी अपेक्षा व्यक्त केली.
