सोलापूर शहरातील फौजदार चावडी, जेल रोड, एमआयडीसी, विजापुर नाका जोडभावी पेठ आणि सदर बझार पोलीस ठाणे हद्दीत सराईत गुन्हेगार, संतोष संजय कांबळे, वय २९ वर्षे, रा. आडवा नळ झोपडपट्टी, जय मल्हार चौक, सोलापूर हा मागील काही वर्षापासुन सातत्याने घातक शस्त्राचा वापर करुन जबरी चोरी, घरफोडी, मोटार सायकल चोरी, खंडणी, खुनाचा प्रयत्न करणे, दरोडा घालण्याची पुर्व तयारी करणे, गैरकायद्याची मंडळी जमविणे या सारखे गंभीर स्वरुपाचे गुन्हे साथीदारांच्या मदतीने, अवैध आर्थिक फायदा मिळवण्यासाठी करीत आला आहे.
त्याच्या विरुध्द अश्या प्रकारे गंभीर स्वरुपाचे एकुण १६ गुन्हे सोलापुर शहरात दाखल आहेत. त्याचे या गुन्हेगारी कृत्यामुळे सोलापुर शहरातील नागरीकांचे दैनंदिन जीवन विस्कळीत होऊन, सार्वजनिक सुव्यवस्थेस बाधा निर्माण झाली आहे. संतोष कांबळे याच्या गुन्हेगारी कृत्यामुळे, त्याची सोलापुर शहरातील व्यापारी व सामान्य नागरीकांमध्ये दहशत असुन, त्याचे विरुध्द सामान्य नागरीक उघडपणे पोलीसांना माहीती देत नाहीत.
संतोष कांबळे यास त्याच्या गुन्हेगारी कारवायापासून परावृत्त करण्यासाठी सन २०१२ मध्ये क.५७ (अ) महाराष्ट्र पोलीस अधिनियमानुसार, सन २०१७ मध्ये क. ११० (ई) (ग) फौ.प्र.सं अधिनियमानुसार आणि सन २०१९ मध्ये क.३ एमपीडीए कायदा, १९८१ अन्वये प्रतिबंधक कारवाया करण्यात आलेल्या आहेत.
त्यानंतरही संतोष संजय कांबळे याच्या वर्तनात कोणताच बदल झाला नाही आणि त्याने सार्वजनिक सुव्यवस्थेस बाधा होईल अशी वरीलप्रमाणे गुन्हेगारी कृत्य चालु ठेवली. त्यामुळे त्याचे गुन्हेगारी कृत्यास वेळीच प्रतिबंध करण्यासाठी पोलीस आयुक्त डॉ. राजेंद्र माने यांनी दि. २०/०६/२०२३ रोजी त्याचे विरुध्द एमपीडीए अधिनियम, १९८१ चे कलम ३ अन्वये स्थानबध्दतेचे आदेश निर्गमित करुन, त्यास दि. २१/०६/२०२३ रोजी स्थानबध्द आदेशाची बजावणी करुन, त्यास येरवडा कारागृह, पुणे येथे दाखल करण्यात आले आहे. पोलीस आयुक्त, डॉ.राजेंद्र माने यांनी कार्यभार स्विकारल्यापासून एमपीडीए कायद्यान्वये स्थानबध्दतेची अकरावी व या वर्षातील सातवी कारवाई आहे.
