सोलापूर ! “राष्ट्रवादी”ने हवेत राहू नये ; (महेश कोठें)ना रोखण्यासाठी काँग्रेसची ही “व्यूहरचना”

सोलापूर महापालिकेत भारतीय जनता पक्षाला जनतेने एकहाती सत्ता दिली होती, मात्र पाच वर्षात कारभार तर करता आलाच नाही, साधे बजेट व्यवस्थित मांडता आले नाही, परंतू पक्षांतर्गत वाद, गटबाजी मात्र चव्हाट्यावर आली. आता राज्यात तीन पक्षाचे सरकार आहे, 

शिवसेनेच्या लेटरपॅड पुरतेच नावाला असलेले महेश कोठे हे राष्ट्रवादी काँग्रेस मध्ये जाणार हे जवळजवळ निश्चित झाल्याने राष्ट्रवादी काँग्रेसला महापौर होण्याची स्वप्न आतापासूनच पडू लागली आहेत. दुसरीकडे काँग्रेसला सोलापूरात जनाधार असल्याने शहर कार्याध्यक्ष मनोज यलगुलवार यांनी पुढचा महापौर कॉंग्रेसचाच असेल असे भाकीत केलंय. 

सोलापूरात शिवसेनेला पहिल्यांदाच 21 नगरसेवक मिळवून देणारे महेश कोठे हे राष्ट्रवादी काँग्रेस मध्ये येणार असल्याने राष्ट्रवादी काँग्रेसची शहरात ताकद वाढणार हे नाकारता येणार नाही. राज्यात जरी महाविकास आघाडी सत्ता असली तरी आगामी स्थानिक स्वराज्य संस्थांच्या निवडणुकांमध्ये शिवसेना, राष्ट्रवादी काँग्रेस व काँग्रेस पक्षाची आघाडी होणे सद्याच्या राजकीय घडामोडी पहिल्या तर शक्यता फारच कमी आहे. 

राष्ट्रवादी काँग्रेसची पुण्यात झालेली बैठक पाहता स्वबळावर निवडणुकांची तयारी करण्याची भाषा दिसून आली. त्यामुळे काँग्रेस पक्षाचे प्रदेशाध्यक्ष नाना पटोले यांच्या आदेशानुसार सोलापूर शहरातील आपली ताकद पाहून महापालिका निवडणुकीच्या सर्व जागा लढवण्याकडे काँग्रेसने आपली वाटचाल सुरू केली आहे. 

गुरुवारी काँग्रेस भवनात शहराध्यक्ष, शहर कार्याध्यक्ष, नगरसेवक, ब्लॉक अध्यक्ष, विविध सेलचे पदाधिकारी यांची बैठक झाली. शहरात तीन मतदारसंघ आहेत त्या विधानसभा मतदारसंघात तीन समित्या करण्याचे ठरले, ही 10 जणांची समिती असेल. त्यामध्ये अल्पसंख्याक, मागासवर्गीय, ओपन, भटके, ओबीसी, महिला, अशा 10 कार्यकर्त्यांचा समिती मध्ये समावेश असणार आहे. ब्लॉक अध्यक्षांनी यंत्रणा राबवून काम करावे, कार्याध्यक्षांनी लक्ष ठेवावे, जुन्या नेत्यांनी मदत करावी, नव्या-जुन्यांची सांगड घालून समित्या नेमण्यात येणार आहेत.

सोलापूरात काँग्रेसला जनाधार असल्याने राष्ट्रवादी काँग्रेसने हवेत राहू नये, महेश कोठे आले तरी फरक पडणार नाही, यापूर्वी विजयसिंह मोहिते पाटील पालकमंत्री असताना प्रयत्न झाला, ज्येष्ठ नेते शरद पवार यांच्या ही सभा झाल्या होत्या, मात्र  काँग्रेसला सत्तेबाहेर खेचू शकले नाहीत, अशी भूमिका कार्यकर्त्यामधून व्यक्त झाली. कोणी काही म्हंटले तरी महेश कोठेंना रोखण्यासाठी काँग्रेसचे सर्व प्रयत्न होतील, वेळ प्रसंगी महापालिका निवडणुकीत  सोलापूरात काँग्रेस-शिवसेनेची आघाडी झालीच तर नवल वाटायला नको.