सोलापूर | या दोन “भावा”चं जुळलं राजकीय ट्युनिंग ; हे आहेत यांच्या समोरील कामांचे अजेंडे

सोलापूर महापालिकेतील आपले नगरसेवक, सर्वांचे दादा म्हणजेच आनंद चंदनशिवे. सभागृहात अभ्यासू मांडणी, नागरिकांची काम करण्यात आक्रमक, विकासकामांना निधी आणण्यात मामा, ताई,बापू, अण्णा, भाऊ यांना गोड-गोड बोलणारे, श्रद्धेय बाळासाहेब आंबेडकर यांच्या नेतृत्वावर विश्वास ठेवून बसपातून “वंचित” झालेले आनंददादा.

दुसरीकडे  जिल्हा परिषदेच्या इतिहासात नशीबवान, कधीही साधं स्वप्नात पण आपण जिल्हा परिषदेचा अध्यक्ष होऊ असे न वाटलेले, गरीब शांत, सरळ, आंबेडकरी असतानाही कौटुंबिक वातावरणामुळे हरिभक्त पारायणकार अनिरुद्ध कांबळे उर्फ ‘केम’ करांचे “अण्णा”. या दोन ‘भावां’ची सध्या चांगलीच जमली आहे. 

दक्षिण सोलापूर तालुक्यातील वळसंग याठिकाणी डॉ बाबासाहेब आंबेडकर यांच्या स्पर्शाने पावन झालेली पाणीपुरवठा विहीर,त्याचे सुशोभीकरण करण्यासाठी चंदनशिवे यांची धडपड. दादा महापालिकेतले आणि हा विषय जिल्हा परिषदेचा, नियोजन होईना, शेवटी आपले अध्यक्ष अनिरुद्ध अण्णा कधी मदतीला येणार, त्यांच्याशी दादांनी घसट केली. समाजबांधव असल्याने भावांची चांगलीच गट्टी जमली, पालकमंत्री भरणे मामांकडून दोघांच्या प्रयत्नाना अखेर यश आलेच.

वळसंग येथील विश्वरत्न डॉ. बाबासाहेब आंबेडकरांनी उद्घाटन केलेली विहीर (आंबेडकर बावडी) व कुंभारी येथील भेट दिलेली पंचाची चावडी तसेच माता रमाई यांचा सहवास लाभलेला माढा तालुक्यातील बावी येथील परिसर सुशोभीकरण करणे व स्मारक उभारणे संदर्भात अनिरुद्ध अण्णा व आनंद दादा हे प्रयत्न करत होते त्यांना यश आलं असून पालकमंत्र्यांनी 25 लाख वळसंग विहिरीसाठी व आमदार सचिन कल्याणशेट्टी यांनी 15 लाखाचा निधी दिला आहे, 

या कामाचे भूमिपूजन आता लवकरच पालकमंत्री दत्तामामा भरणे यांच्या हस्ते करण्याचे नियोजन असून जिल्हा परिषद अध्यक्ष अनिरुद्ध कांबळे यांनी महापालिकेचे गटनेते आनंद चंदनशिवे यांची बैठक झाली त्यांनी कार्यक्रमाची तयारी सुरू केली आहे. एकूणच या दोन भावांमध्ये चांगले संबंध निर्माण झाले आहेत.

जिल्ह्यातील महामानव डॉ बाबासाहेब आंबेडकर यांच्याशी निगडित तीन चांगली कामे मार्गी लागणार आहेत.अनिरुद्ध अण्णा नशीबवान, त्यांच्या हस्ते तर सांगोल्यात कोळे गावात महामानवांच्या अस्थिविहाराचे भूमिपूजन झाले. आता त्यांच्याच अध्यक्षतेखाली वळसंगच्या विहिरीचे सुशोभीकरण होत आहे. आनंद दादांनी आपल्या महापालिकेच्या कार्यकाळात 2011 मध्ये मिलिंद नगरात डॉ बाबासाहेब आंबेडकर यांच्या अस्थिविहार प्रेरणाभूमीची उभारणी करण्याची मोठे काम केले आहे.