राज्याचं पावसाळी अधिवेशन येत्या पाच आणि सहा जुलैला होणार आहे. या अधिवेशनात विधानसभा अध्यक्षांची निवड होणार आहे. विधानसभा अध्यक्षांची निवड याच अधिवेशनात होणार आहे आणि तो अध्यक्ष काँग्रेसचा असेल, असं काँग्रेस नेते बाळासाहेब थोरात यांनी सांगितलं. यामध्ये पुणे जिल्ह्यातील भोर मतदार संघाचे आमदार संग्राम थोपटे हे यांचं नाव आघाडीवर आहे आणि त्यांच्याच नावावर शिक्कामोर्तब होण्याची दाट शक्यता वर्तवली जात आहे.
कोण आहेत संग्राम थोपटे?
संग्राम थोपटे हे काँग्रेसचे विद्यमान आमदार आहेत,ते पुणे जिल्ह्यातील भोर विधानसभा मतदारसंघाचं नेतृत्व करतात, संग्राम थोपटे तीनवेळा आमदार म्हणून निवडून आले आहेत, महाविकास आघाडी सरकारमध्ये मंत्रिपद मिळेल अशी आशा त्यांना होती, मात्र मंत्रिपद न मिळाल्याने त्यांच्या कार्यकर्त्यांनी पुणे काँग्रेस कार्यालयात तोडफोड केली होती. आमदार संग्राम थोपटे हे बारामतीकरांचे कट्टर विरोधक समजले जातात, आता महाविकासआघाडी असल्याने काँग्रेसने थोपटे यांना विधानसभा अध्यक्ष करण्याचे निश्चित केल्याची चर्चा आहे, थोपटे यांच्या बाबत राष्ट्रवादीचे प्रदेशाध्यक्ष जयंत पाटील यांना विचारले असता महाविकास आघाडी सरकारमध्ये विधानसभा अध्यक्षपद काँग्रेस कडे असल्याने ते जो व्यक्ती निवडतील तो आम्हा सर्वांना मान्यच करावा लागेल.
