सोलापूर शहरातील भारतीय जनता पार्टीचे ज्येष्ठ आमदार विजयकुमार देशमुख आणि महानगरपालिकेतील ज्येष्ठ नगरसेवक सुरेश आण्णा पाटील दोन नेते बर्याच दिवसांनी एकत्र आल्याचं दिसून आलं. अनेक दिवसांपासून हे दोन नेते एकत्र दिसले नव्हते. सुरेश पाटलांचा बंडखोर आणि आक्रमक स्वभाव असल्याने मागील काही दिवसाच्या घडामोडी पाहता सुरेश अण्णा भाजप सोडणार का? अशी चर्चा राजकीय वर्तुळात रंगली होती. महापालिकेमध्ये घोंगडे वस्ती इथल्या अतिक्रमण पाडकाम प्रकरणावरून सुरेश पाटील यांनी पक्षाच्या विरोधात भूमिका घेतली होती सभागृहात महापौरांचा अपमान केल्याबद्दल त्यांना निलंबित करण्यात आले होते या एकूणच सर्व घडामोडी पाहता विरोधी पक्षाच्या काही गटनेत्यांनी तसेच शिवसेनेने अण्णाची बाजू घेतली, शिवसेनेच्या जिल्हा प्रमुखांनी तर सुरेश पाटलांचा सत्कार केला होता. भाजपच्याच नगरसेवकांनी या प्रकरणात पेढे सुद्धा वाटले होते. या सर्व राजकीय घडामोडीच्या पार्श्वभूमीवर गुरुवारी शहर उत्तर चे आमदार विजयकुमार देशमुख, ज्येष्ठ नगरसेवक सुरेश पाटील, माजी सभागृहनेता संजय कोळी, नगरसेवक अविनाश पाटील, संजय कणके हे सर्व एकत्र आल्याचं पाहायला मिळालं.
रुपाभवानी स्मशानभूमीत आमदार विजयकुमार देशमुख यांच्या निधीतून 49 लाखाचे विकास कामे सुरू आहेत याची पाहणी या सर्व नेत्यांनी केली, त्यानंतर बाजूलाच असलेल्या स्वातंत्र्यसेनानी किसन सारडा यांच्या स्मारकाची पाहणीही या सर्व नेत्यांनी केली. सारडा स्मारकासाठी मोठ्या प्रमाणात निधी उपलब्ध करून देण्यात आला असताना या पूर्वी कामे न करता पंधरा लाखाची बिले परस्पर उचलण्यात आली असल्याचे उघड झाले, त्यामुळे या कामात भ्रष्टाचार झाल्याची माहिती उघड झाली आहे. सुरेश पाटील यांनी या प्रकरणाची चौकशी करून दोषींवर कारवाई करण्याची मागणी केली महापालिकेचे नगर अभियंता कारंजे यांनी या प्रकरणात सुमारे दहा लाखांचा भ्रष्टाचार झाल्याचे कबूल केले याची चौकशी करून कारवाई करण्याचे आश्वासन यावेळी त्यांनी दिले.
आगामी महापालिका निवडणुकीच्या तोंडावर भाजपचे हे दोन नेते पुन्हा एकत्र आले, हे भाजप साठी फायदेशीर असले तरी सध्या शहरात महाविकास आघाडीतील तिन्ही पक्षांनी स्वबळावरची तयारी केली आहे. राष्ट्रवादी काँग्रेस महेश कोठे यांच्याअडून सत्तेचे स्वप्न पाहत आहे, काँग्रेसच्या आमदार प्रणिती शिंदे या महापालिकेची सत्ता पुन्हा आपल्या ताब्यात घेण्यासाठी प्रयत्न करत आहेत तर शिवसेना आपल्या शिव संपर्क अभियानातून जोरदार मोर्चेबांधणी करताना दिसत आहे भारतीय जनता पार्टी मात्र गटबाजी मध्ये अडकली असून दोन देशमुख अजूनही महापालिकेसाठी गंभीर नसल्याचे भारतीय जनता पार्टीच्या कार्यकर्त्यांमधून बोलले जात आहे.
