सोलापूर जिल्हा परिषदेची सर्वसाधारण सभा 12 जुलै रोजी होणार असल्याने सदस्य खुशीत होते, सभेच्या दोन दिवसांपूर्वी जिल्हा आपत्ती व्यवस्थापन कक्षाने सभा ऑनलाइन घेण्याचे पत्र दिले, त्यामुळे संतापलेल्या सदस्यांनी प्रवेशद्वारासमोर ठिय्या आंदोलन केले, सभा ही ऑफलाईन पध्दतीने खुल्या जागेत घेण्याची मागणी केली.
शेवटी अध्यक्ष अनिरुद्ध कांबळे व मुख्य कार्यकारी अधिकारी दिलीप स्वामी यांनी एकत्र येऊन सभेची तारीख पुढे ढकलली, सुरुवातीला 19 तारीख काढली, नंतर 22 झाली आता 26 जुलै रोजी होणार आहे. महापालिका आयुक्तांनी फडकुले सभागृहात परवानगी नाकारली आहे, आता सदस्यांनी आपल्या जिल्हा परिषदेच्या सभागृहात सभा होणार असल्याने जोरदार तयारी केली आहे, सध्या आरोग्य, समाज कल्याण, ग्रामपंचायत, पशुसंवर्धन, महिला व बालकल्याण हे विभाग रडारवर आहेत.
सभा तीन दिवसांवर आल्याने आणि जिल्हाधिकारी मिलिंद शंभरकर, महापालिका आयुक्त पी शिवशंकर हे परवानगी देत नाहीत आणि सदस्य खुल्या सभेसाठी आक्रमक असल्याने अधिकाऱ्यांची चिंता वाढली आहे. जिल्हा आपत्ती व्यवस्थापन विभागाच्या परवानगी शिवाय सभा झाल्यास निश्चितच गुन्हे दाखल केले जाणार आहेत, त्यात अधिकाऱ्यांवर गुन्हे दाखल होतील, सर्वसाधारण सभेचा सचिव म्हणून उपमुख्य कार्यकारी अधिकारी परमेश्वर राऊत यांच्यावर गुन्हा दाखल होतो. प्रशासन आणि सदस्यांमध्ये वाद होऊ नये म्हणून मुख्य कार्यकारी अधिकारी स्वामी हे प्रयत्नशील आहेत. सभा ही व्हावी , जरी ऑनलाइन झाली तरी सर्वाना जॉईन होता यावे, बोलता यावे, मध्यम मार्ग काढण्यासाठी त्यांनी प्रमुख अधिकाऱ्यांची बैठक घेत चर्चा केल्याचं समजत असून स्थायी समितीच्या सभेनंतर तोडगा निघेल अशी आशा प्रशासनाला आहे.
