सोलापूर शहर व जिल्ह्यात राष्ट्रवादी काँग्रेसची ताकद दिवसेंदिवस वाढत आहे, एनसीपीचा सध्या सोलापूर महापालिकेच्या सत्तेवर डोळा असून महाविकास आघाडीच्या नावाखाली पद्धतशीर महेश कोठे यांना ताकद पुरवली जात आहे, शहरासोबतच राष्ट्रवादी काँग्रेसने आता दोन मतदारसंघावर आपली नजर ठेवली आहे, त्यामध्ये शहर उत्तर आणि दक्षिण सोलापूर विधानसभेचा समावेश आहे. महेश कोठे यांच्या नेतृत्वाखाली महापालिकेत चांगले यश मिळाल्यास उत्तर मतदारसंघात कोठेंची उमेदवारी निश्चित होऊन जाईल.
दक्षिण विधानसभा मतदारसंघात काँग्रेसची ताकद आहे, 2019 च्या विधानसभा निवडणुकीत राज्याचे माजी सहकार मंत्री सुभाष देशमुख यांच्यासमोर नवखे असलेले बाबा मिस्त्री काय चालणार अशी चर्चा होती, दक्षिण तालुक्यातील भल्या भल्या नेत्यांनी टांग मारली, आपले मतदारसंघ बदलले, काहीजण तर हॉस्पिटलमध्ये खाटाला धरून बसले मात्र बाबा मिस्त्री यांनी चांगलीच फाईट दिली, काँग्रेस नेतृत्वाच्या दोन चार सभा आणि थोडीशी आर्थिक मदत झाली असती तर भाजपला बाबांनी धूळ चारली असती.
आता सत्तेच्या अडून दक्षिण तालुक्याचे नेते व अहिल्यादेवी होळकर सोलापूर विद्यापीठ स्मारक समितीचे सदस्य बाळासाहेब बंडगर यांनी आपली मोर्चेबांधणी सुरू केली आहे, बंडगर यांना लोक मामा म्हणत असल्याने हे मामा आता अनेकांना आपलेसे वाटू लागले आहेत, प्रत्येक आठवड्यात दोन चार दिवस मामा हे तालुक्यात असतात, गाठीभेटी, कार्यक्रम, लग्न, मयत या सर्वांना ते जात आहेत, विशेष म्हणजे बंडगर मामा हे धनगर समाजाचे असल्याने तो समाज आणि त्या समाजातील युवक वर्ग त्यांच्याकडे खेचला जातोय, दक्षिण तालुक्यातील सीना नदीवरील बंदलगी बंधाऱ्याच्या विषयात मामांनी लक्ष घातलंय, सीना पट्ट्यातील शेतकऱ्यांचा हा विषय अस्मितेचा आहे.
बंडगर मामा सोबतच आता प्रदेश प्रवक्ते, जिल्हा कार्यकारी अध्यक्ष उमेश पाटील यांनी (विधान परिषदेला संधी न मिळाल्याने) आपले लक्ष दक्षिणवर केंद्रित केले आहे. मागील काही दिवसात अनेक गावांत झंझावात दौरा करून पाटलांनी राष्ट्रवादी काँग्रेसच्या शाखा ओपन केल्या आहेत, यापूर्वीच उमेश पाटलांनी आपण भविष्यात दक्षिण विधानसभा लढवणार असे माध्यमांना सांगितले होते,
उमेश पाटलांची हायटेक यंत्रणा आहे, अजितदादा यांच्या जवळचा नेता असल्याने सत्तेचा रुबाब त्यांच्या चालण्या, बोलण्यात आणि वागण्यात दिसून येतो, आता ते प्रत्येक जिल्हा परिषद मतदारसंघ निहाय “नागरिकांचा जनता दरबार” हा उपक्रम राबविणार आहेत याची सुरुवात अक्कलकोट तालुक्यातून होतेय.
दक्षिण हा सर्वसामान्य माणसाला डोक्यावर घेणारा तालुका असल्याने जो सर्वात मिसळतो, सोबत बसतो, सुखादुखात येतो-जातो अशीच लोक चालतात, मग या सर्वात उमेश पाटील बसतात की बंडगर मामा हे कार्यकर्त्यांच्या मागणीनुसार नंतर पक्षच ठरवेल. आघाडीत हा तालुका काँग्रेसला असला तरी राष्ट्रवादी काँग्रेसने आपली मोर्चेबांधणी पद्धतशीर सुरू ठेवलीय हे मात्र नक्की.
