सोलापूर ! आजपर्यंत आपण नटसम्राट या नाटकातील कुणी घर देता का घर? हे वाक्य अनेक वेळा म्हणजेच हजारों वेळा ऐकल असेलच, ते जेव्हा चित्र पाहतो तेव्हा ते मनाला भावून जाते. सोलापूर जिल्हा परिषदेत घर नाही पण कुणी गाडी देता का गाडी अशी हाक आता सर्वत्र ऐकण्यास मिळत आहे, ही गाडी मागणारा जिल्हा परिषदेचा अधिकारी काय पाणी व स्वच्छता विभागाचा, महिला व बालकल्याण विभागाचा, पशुसंवर्धन विभागाचा, कृषी विभागाचा नाही तर तो अधिकारी आहे, जिल्हा परिषदेमध्ये सर्वात जास्त मालदार खाते असलेल्या “बांधकाम”विभागाचा.
जिल्हा परिषद बांधकाम विभाग क्रमांक एक चे कार्यकारी अभियंता पी डी कदम यांच्याकडे सध्या शासकीय गाडी आहे ती म्हणजे जुनी ambassador ही कार. सध्या या कंपनीच्या कार झेडपीच्या यंत्रशाळेत असून स्क्रॅपमध्ये पडून आहेत. त्यातलीच एक गाडी कदम साहेबांना वापरण्यास दिली गेलीय, तसे तर कदम साहेबांकडे अशा अनेक गाड्या असतील, पण आणावं कुणी? परंतू त्यांना शासनाची गाडीच हवी आहे, इतर अधिकाऱ्यांकडे मात्र मोठ्या स्टायलिश गाड्या आहेत, जेव्हा कदम हे या गाडीत जिल्हा परिषदेत येतात, तेव्हा त्यातून उतरताना वाईट फिलिंग म्हणजेच चेहरा पडलेल्या अवस्थेत असल्याचे माध्यम प्रतिनिधींना वारंवार दिसून येते, बांधकाम विभाग क्रमांक 2 चे कार्यकारी अभियंता माने मात्र स्वतःची गाडी वापरतात.
कदम यांना गाडी संदर्भात विचारले असता नव्या गाडी खरेदीची फाईल किती दिवस झाले पडून आहे कुणी त्यावर निर्णय घेत नाही, मला कामे तपासणीला जाण्यासाठी ग्रामीण भागात फिरावे लागते, त्यासाठी नव्या आणि मोठ्या गाडीची गरज असते,गाडी जुनी असल्याने वेळ जातो,कधी बंद पडेल याचा नेम नाही, अशी गाडी घेऊन ग्रामीण भागात कसे फिरता येईल?असा सवाल कदम यांचा आहे.
बांधकाम विभागाचे कार्यकारी अभियंता असल्याने कदम यांच्याकडे मोठी वर्दळ असते, कॉन्ट्रॅक्टर तर साहेबांच्या केबिन बाहेर रांग लावून थांबून असतात, अनेक जण साहेबांना भेटायला येतात, केबिन जरी जुनाट दिसलं तरी आत बरंच नवं कोरं चालत असल्याची चर्चा झेडपीत असते. प्रत्येकाचं ठरलेलं आहे. ते बरोबर पोहोच होतं, अशा मालदार विभागाच्या अधिकाऱ्यांकडून कुणी गाडी देता का गाडी म्हणणं कुणालाही पटलेलं नाही रावं.
