सोलापूर शहरांमध्ये शहर उत्तर हा भारतीय जनता पार्टीचा बालेकिल्ला समजला जातो. महेश कोठे हे शिवसेनेत गेल्याने शहर उत्तर मधील काँग्रेसची आहे ती प्रतिष्ठा संपली विशेष म्हणजे महापालिकेवर वर्षानुवर्ष सत्ता भोगलेल्या काँग्रेसला शहर उत्तर विधानसभा मतदार संघात एक ही नगरसेवक निवडून आणता आला नाही ही काँग्रेसची सर्वात मोठी नामुष्की होती. भाजपने महापालिकेत एक हाती सत्ता मिळवली मात्र पाच वर्षांमध्ये त्यांचा कारभार पाहिला तर दोन देशमुख मंत्र्यांमध्ये भांडणे, मोठी गटबाजी, महापौर- सभागृह नेते मधील वाद हे सर्व चव्हाट्यावर आले महापालिकेत पहिल्यांदाच सत्ता मिळालेल्या भाजपला धड बजेट मांडता आले नाही. पाच वर्षात नगरसेवकांना व्यवस्थित विकास निधी सुद्धा मिळाला नाही. एकूण अशाच वातावरणात आता केवळ सहा महिन्यावर महापालिकेची सार्वत्रिक निवडणूक होणार आहे त्यासाठी सर्व पक्ष तयारीला लागले आहेत.
काँग्रेस पक्षाने सोलापूरची संपूर्ण जबाबदारी ही पक्षाच्या प्रदेश कार्याध्यक्ष तथा सोलापूरच्या आमदार प्रणिती शिंदे यांच्यावर सोपवली आहे. महापालिकेच्या पार्श्वभूमीवर काँग्रेस मनामनात, काँग्रेस घराघरात ही संकल्पना राबवली जात आहे त्या अंतर्गत शहर उत्तर मधील अध्यक्ष प्रकाश वाले यांचे चिरंजीव प्रवीण वाले यांच्या पहिल्या शाखेचे उद्घाटन करण्यात आले त्या कार्यक्रमाला युवकांची प्रचंड अशी गर्दी होती त्याच कार्यक्रमातून आमदार प्रणिती शिंदे यांनी महानगरपालिकेचे रणशिंग फुंकले.
भारतीय जनता पार्टीला लक्ष करत आमदार विजय देशमुख यांच्यावर अनेक तोफा डागल्या, पाणीप्रश्न रस्त्यांचा प्रश्न यावर त्यांनी थेट भाजपच्या आमदारांना चॅलेंज देऊन टाकले या कार्यक्रमातील आमदार प्रणिती शिंदे, ज्येष्ठ नेते सुधीर खरटमल गटनेते चेतन नरोटे यांच्या भाषणाची प्रचंड चर्चा झाली प्रत्येकाच्या तोंडी या कार्यक्रमाचाच बोलबाला दिसला, भारतीय जनता पार्टीच्या कार्यकर्ते नेत्यांनी या कार्यक्रमाचा एक प्रकारचा धक्काच घेतला असे चित्र दिसत आहे विजयकुमार देशमुख यांनी यावर स्वतः न बोलता माजी मंत्री लक्ष्मणराव ढोबळे यांच्या खांद्यावर बंदूक ठेवली, ढोबळे सर यांना केवळ बोलण्याचे निमित्त हवे असते त्यांनी सुशीलकुमार शिंदे, आमदार प्रणिती शिंदे यांच्यावर तोंडसुख घेतले मात्र त्यांच्याच तालमीत तयार झालेल्या काही युवा कार्यकर्त्यांनी ढोबळे सरांची पोलखोल केली.
काँग्रेसने शहर उत्तर मधील मुनाळे, केदार उंबरजे, कुमार वाले यांना मोठमोठी पदे दिली मात्र ते सध्या कुठेही दिसत नाहीत, केदार उंबरजे यांच्या डिजिटलवर तर आमदार विजय देशमुख विजयसिंह मोहिते-पाटील यांचे फोटो दिसून येतात.
ज्या पद्धतीने राष्ट्रवादीचे नेते शरद पवार यांनी विधानसभा निवडणुकीपूर्वी सोलापूर मधील सभेने अख्या राज्यभरात वातावरण तयार केले होते तसेच वातावरण काँग्रेसचे शहर उत्तर मधील त्या एका कार्यक्रमाने तयार झाले आहे. ते वातावरण काँग्रेसला अद्यापही कॅच करता आले नाही. त्याच पद्धतीचे कार्यक्रम दर आठवड्याला काँग्रेस राबवत गेली तर निश्चितच होणाऱ्या वातावरण निर्मितीचा भविष्यातील महापालिका निवडणुकीत फायदा झाल्याशिवाय राहणार नाही.
