सोलापूर : सुशीलकुमार शिंदेंनी बसवराज बगलेंना चांगलेच झापले ; ‘आत्मक्लेश’ आले ‘अंगलट’ |काय घडले ‘जनवात्सल्य’वर त्यादिवशी

सोलापूर : सोलापूर जिल्हा काँग्रेसचे माजी प्रवक्ते बसवराज बगले यांनी मागील काही दिवसात आमदार प्रणिती शिंदे (MLA Praniti shinde) यांच्या धोरणांविरोधात भूमिका घेतली.  बगले यांनी आमदार प्रणिती शिंदे यांना युवक काँग्रेसच्या निवडणुकीत हस्तक्षेप करण्याचा अधिकार आहे का?असा प्रश्न उपस्थित केला होता. त्यानंतर काँग्रेस भवना समोर आत्मक्लेश आंदोलन करून पक्षातील नेत्यांच्या कारभारावर शिंतोडे उडवले. तेव्हापासून बगले  अनेकांच्या दातात आले. हा विषय पक्षाच्या राज्य प्रभारी पर्यंत गेल्याचे सूत्रांकडून समजले.

ज्येष्ठ नेते सुशीलकुमार शिंदे (Sushilkumar Shinde) हे मागील तीन दिवस झाले सोलापुरात आहेत. महिन्याभरात घडलेल्या पक्षांतर्गत घडामोडी वर ते लक्ष ठेवून होते. सोमवारी काँग्रेस भवनात त्यांनी बैठकीला उपस्थिती लावली. त्यांचे बऱ्याच दिवसांनी असे आक्रमक रूप पाहण्यास मिळाले. पक्षात बदमाशी करत असलेल्यांना त्यांनी एकप्रकारे दम भरला.

दरम्यान काँग्रेस मधील नेत्यांकडून अशी माहिती मिळाली की, या बैठकीनंतर जेव्हा ते दुपारी जनवात्सल्य निवासस्थानी होते, तेव्हा भेटण्यासाठी बसवराज बगले (Basavaraj Bagale) गेले. मात्र शिंदे यांनी बगले यांना झाप झाप झापले, तुमचा आजपासून माझ्याशी कोणताही संबंध नाही, परत माझ्याकडे यायचे नाही, निघा इथून एवढ्या पर्यंत शिंदे यांचा पारा गेला होता, बगले यांनी एकदा माझे ऐकूण घ्या साहेब, मला बोलण्याची संधी द्या अशी विनंती केली मात्र ते ऐकण्याच्या मनस्थितीत नव्हते. बगले याना एकप्रकारे जनवात्सल्यचा दरवाजा बंद झाल्याचं बोललं जातं आहे.

जिल्हाध्यक्ष धवलसिंह मोहिते पाटील (Dhavalsinh Mohite-Patil) यांना ही सुशीलकुमार शिंदे यांनी विचारणा केली, बसवराज  बगले यांना पद का दिले. तेव्हा धवलसिंहांनी मी पद कसे देणार अजून पदाधिकारी निवडी नाहीत, उलट माजी जिल्हाध्यक्ष प्रकाश पाटील यांनी ऑगस्ट महिन्यात बगले यांचा काँग्रेस प्रवेश देत त्यांना जिल्हा प्रवक्ता निवडीचे पद दिल्याचे मोहिते पाटलांनी फोटो दाखवत आपले स्पष्टीकरण दिल्याची चर्चा काँग्रेस भवनात आहे.

धवलसिंह हे जिल्हाध्यक्ष झाल्यापासून बसवराज बगले यांचा काँग्रेस भवनात वावर वाढला होता. बगले यांच्या मागची भूमिका ही धवलसिंहांचीच आहे का? अशी ही कुजबूज काँग्रेसमध्ये होती. त्यामुळे जिल्हाध्यक्ष मोहिते पाटील हे विनाकारण अडचणीत आल्याचे बोलले जात होते. मात्र शिंदे साहेबांच्या या दौऱ्यात “दूध का दूध,पाणी का पानी” झाले.