सोलापूर : बार्शी शहरातील कोट्यवधी रुपयांचा शेअर बाजार आर्थिक गुंतवणूक घोटाळ्यातील प्रमुख आरोपी विशाल फटे हा स्वतः हून पोलिस अधीक्षक कार्यालयात हजर झाला. पोलीस अधीक्षक तेजस्वी सातपुते यांनी याप्रकरणी अधिक माहिती दिली.
त्याला नंतर ग्रामीण पोलिसांनी गुरुनानक चौकातील तालुका पोलीस ठाण्यातील गुन्हे शाखेच्या कार्यालयात नेले तिथे रात्री बराच वेळ विशाल फटे याची चौकशी सुरू होती. त्यानंतर त्याला वैद्यकीय तपासणी साठी सिव्हील हॉस्पिटलमध्ये घेऊन जाणार होते.
आठ दिवसांपासून सोलापूर शहर व जिल्ह्यासह राज्यात केवळ विशाल फटे याच्या कारनाम्याची चर्चा केली जात होती, रोज नवनवे प्रकरण समोर येत होते, आर्थिक गुंतवणूकीचा आकडा वाढत होता. याप्रकरणी फटे याचे वडील व भावाला पोलिसांनी अटक केली होती.
सोमवारी दुपारी सोलापूर शहरातील एका इमारतीतून त्याने युट्यूब वर व्हिडीओ बनवून तो स्वतः शेअर केला आणि आपण रात्री पोलिसात हजर होणार असल्याचे सांगितले होते.
