सोलापूर : पालकमंत्री दत्तात्रय भरणे हे प्रजासत्ताक दिनासाठी सोलापुरात दोन दिवस तळ ठोकून आहेत. शहरात अनेक कार्यक्रम त्यानिमित्ताने घेण्यात आले आहेत. 26 जानेवारी दिवशी सकाळी दहाच्या सुमारास एमआयएम नगरसेवक रियाज खरादी यांच्या जिंदा शाहमदार चौक ते पद्मशाली चौक दरम्यान रस्ता कॉंक्रिटीकरण कामाचे उद्घाटन हा कार्यक्रम पालकमंत्र्यांच्या शासकीय दौर्यात नियोजित होता. या कामाला सुमारे 87 लाखाचा निधी मंजूर आहे.
दरम्यान हा मतदार संघ काँग्रेसच्या आमदार प्रणिती शिंदे यांचा आहे आणि रियाज खरादी हे एमआयएम पक्षाचे नगरसेवक आहेत. महाविकास आघाडीची बैठक संपली त्या बैठकीला काँग्रेसच्या आमदार प्रणिती शिंदे, माजी मंत्री सिद्धाराम म्हेत्रे, शहराध्यक्ष प्रकाश वाले, ज्येष्ठ नगरसेवक बाबा मिस्त्री, कार्याध्यक्ष संजय हेमगडी, कार्याध्यक्ष मनोज यलगुलवार, गटनेते चेतन नरोटे उपस्थित होते.
बैठकीनंतर आमदार प्रणिती शिंदे या आपल्या समर्थकांसह पालकमंत्र्यांकडे पुन्हा आल्या त्यांनी त्यांच्या कानामध्ये काहीतरी कुजबुजले. यावर लगेच पालकमंत्री भरणे यांनी आपल्या स्वीय सहाय्यकाला आपल्या दौरा मधील तो कार्यक्रम रद्द करा अशा सूचना केल्या, कुणी घ्यायला सांगितला हा कार्यक्रम असे ही ते म्हणाले. याच वेळी नगरसेवक तोफिक शेख त्याठिकाणी उपस्थित होते त्यांना जे काय चालू आहे ते समजले. ते सुद्धा अचंबित झाले.
काही वेळाने पालकमंत्री भरणे मामा पत्रकारांसोबत चर्चा करत असताना नगरसेवक रियाज खरादी त्याठिकाणी आलेत त्यांच्या चेहर्यावर कार्यक्रम रद्द झाल्याचे दुःख दिसत होते मात्र पालकमंत्री भरणे यांनी सावरून घेताना हा खूप मोठा कार्यक्रम आहे तिथे कोणतीही गर्दी करायची नाही कोरोनाच्या काळात गर्दी करायची नाही आपण नंतर हा कार्यक्रम मोठा घेऊ असे सांगून वेळ मारून नेली.
यावरून काँग्रेस आणि राष्ट्रवादीने एकत्रित येऊन एमआयएमची गेम केल्याचा चित्र पाहायला मिळालं. नगरसेवक रियाज खरादी हे एमआयएमच्या नेतृत्वावर नाराज आहेत ते जरी राष्ट्रवादी काँग्रेसच्या संपर्कात असले तरी त्यांनी अद्यापही पक्ष सोडलेला नाही त्यामुळे त्यांना मोठा फटका बसल्याचे मंगळवारी झालेल्या घडामोडी वरून दिसून आले.
