सोलापूर : मुलाचा वाढदिवस सार्वजनिक ठिकाणी साजरा करून येणाऱ्या जाणाऱ्यांना अडथळा तसेच कोरोना ओमीक्रोन संसर्गाच्या प्रतिबंधक नियमांचे पालन न करणे, सार्वजनिक ठिकाणी कार्यक्रम साजरा करणे, मनाईहुकूम असताना वाढदिवसाचा सत्कार कार्यक्रम केल्याप्रकरणी रिपब्लिकन पार्टी ऑफ इंडिया आठवले गटाचे ज्येष्ठ नेते राजाभाऊ सरवदे यांच्यासह त्यांचे चिरंजीव सुशिल सरवदे यांच्यावर गुन्हा दाखल झाला आहे. विशेष म्हणजे सुशील सरवदे यांच्यावर दोन गुन्हे पोलिसांनी दाखल केले आहेत.
सामाजिक, सांस्कृतिक, राजकीय कार्यक्रम साजरे करण्यास मनाई हुकुम असताना सुध्दा तसेच पोलीस आयुक्तालयाकडून घोषित करण्यात आलेल्या जमावबंदीचा आदेश धुडकावून सार्वजनिक रस्त्यावर वाढदिवस साजरा सरवदे केल्याप्रकरणी पिता-पुत्रावर फौजदार चावडी पोलिस ठाण्यात गुन्हा दाखल झाला आहे.
कोरोना crime व ओमायक्रोन संसर्ग रोखण्याच्या अनुषंगाने लोकांची गर्दी करू नये याकरिता प्रशासनाने शहरात काही निर्बंध लादले आहे. असे असताना सुद्धा वाहतुकीस अडथळा करून, मोठ्या प्रमाणात जमाव जमवून सार्वजनिक रस्त्यावर मंडप मारून वाढदिवस साजरा केला.
या प्रकरणी राजाभाऊ तुकाराम सरवदे, मुलगा सुशील राजाभाऊ सरवदे (दोघे रा. मिलिंद नगर, बुधवार पेठ, सोलापूर) या दोघांच्या विरोधात फौजदार चावडी पोलीस ठाण्यात गुन्हा दाखल झाला आहे. पोलीस कॉन्स्टेबल नितीन दत्तात्रय मोरे याने गुन्हा दाखल केला आहे. घटनेचा अधिक तपास पोलिस नाईक मूर्ती हे करीत आहे.
